Еліміз егемендік алғалы бері 1 миллионнан астам қандасымыз атамекенге оралды, деп хабарлайды 24kz.
Ақмола облысының өзіне 42 мыңнан астам этникалық қазақ көшіп келді. Олардың дені Монғолия, Қытай мен Ресейден қоныс аударған.
Қазір қаракөз бауырларымыз жергілікті халықпен біте қайнасып, тату-тәтті күн кешіп жатыр.
Абзал Азаматұлы, тілші:
- Атамекенге қоныс аударған қандастарымыздың бірі – Жырғау Туғанбайұлының отбасы. Моңғолиядан көшіп келген олар қазір Көкшетау қаласының іргесіндегі Нұрлы көш ауылында тұрады. Қазақстан тәуелсіздігін алды дегенді естіп, олар көшті бірден ел жаққа бұрған.
Жырғау Туғанбай, Нұрлы көш ауылының тұрғыны:
- Қазақстан Республикасы тәуелсіздік алғаннан кейін Монғолиядағы аз ғана қазақ тымағын аспанға атып, қатты қуанды ғой. Сонымен, 1992 жылы біздің туыстар 100-дей үй бірақ осы Қазақстанға қоныс аударды. Ол кезде біздің ауыл өте малды болды. Біздің туыстар 500 бас малды жай тиынға тастады да, бізге ең бірінші қазақ еліне жету керек үлкен мақсат қойды.
Моңғолияда заңгер мамандығын меңгерген кейіпкеріміз ол жақта көптеген лауазымды қызметтер атқарады. Елге оралған соң да қоғамдық жұмыстарға білек сыбана кіріседі. Әсіресе, Нұрлы көш ауылындағы мәселелердің шешілуіне атсалысады. Қоғамдық кеңестің төрағасы болып, жергілікті халықтың мұң-мұқтажын биліктің құлағына жеткізеді. Нәтижесінде ауыл жолдары жөнделіп, 280 орынға арналған жаңа балабақша салынған.
Жырғау Туғанбай, Нұрлы көш ауылының тұрғыны:
- Нұрлы көш ауылында енді шешілмей тұрған жалғыз мәселе мектеп қана. Басқа мәселе 100% шешілді. Ел мен ел қазір араласып, құда-жекжат болып керемет бір ауыл қалыптасып келеді. Басында тәртіпсіздіктер өте көп болды. Ұрлық-қарлық. Жоғары, төмен жүгіргеннің арқасында милицияның бір пунктін аштырып алдық, мына жерде медпунт аштырып алдық. Соның арқасында барлығы дұрысталды.
Жалпы аталған елді мекен Тұңғыш Президенттің пәрменімен осыдан 15 жыл бұрын бой көтерді. Қазір мұнда 300-ге жуық түтін бар. 7 мемлекеттен қоныс аударған мың жарымға жуық халық тұрады. Олардың барлығы мемлекеттік қолдауға ие болды.
Алмагүл Серенова, Жұмыспен қамту және ӘБ үйлестіру басқармасының бөлім басшысы;
- Қандастарға материалдық көмектің негізгі үш түрі көрсетіледі. Алдымен олардың көшуі және үй тапқанға дейін жалдап тұратын баспанасының ақысы төленеді. Сондай-ақ еңбек ұтқырлығы бойынша үй алуға 4,5 млн.теңге болатын арнайы сертификат беріледі.
Соңғы үш жылда аймаққа мыңнан астам этникалық қазақ қоныстанды. Оларға мемлекет тарапынан айрықша қолдау көрсетілді. Мәселен, көшуге 288 млн теңге және тұрғын үй жалдауға 117 млн теңге қарастырылды. Бұдан бөлек, баспана сатып алуға 450 млн теңге бөлінді. Жалпы жыл басынан бері өңірде 418 адам қандас мәртебесін алды.
Авторлары: Абзал Азаматұлы, Евгений Шинкаренко
