Өскемендегі саяжай тұрғындары жүк көліктерінің қозғалысын шектеуді талап етіп отыр, деп хабарлайды 24KZ. Құрылысқа қажетті қиыршықтас алынатын өндірістік карьерлер екі мыңнан астам тұрғыны бар саяжай алабына жақын маңда орналасқан. «Ауыр жүк көліктері саяжай ішімен жүріп, жолдарды әбден бүлдірді», – дейді жергілікті халық. Табиғаты көркем аумақтың қазір қауіпті екенін айтып, дабыл қағып отыр.

Екі мыңнан аса тұрғыны бар саяжай бұған дейін жанға жайлы орын еді. Ертіс өзенінің жағасындағы мына әсем аумақ қазір жүк көліктері тынымсыз қатынайтын техникалық жолға айналды. Ал тұрғындар өз қауіпсіздігіне алаңдаулы. Өйткені жүк көліктері жүрген сайын шаң көтеріледі. «Жүргізушілер жылдамдықты бәсеңдетпейді», – дейді тұрғындар.

Владимир Лысенко, саяжай кооперативінің төрағасы:

- Қазір бұл жолмен ересектер де, балалар да жүреді. Шаңның арасынан көрінбей қалып, адам жазым бола ма деп қорқамыз. Бұған ерекше назар аудару керек. Қазір мұнда қиыршықтас өндіретін 5 карьер бар. Жүк көліктерінің үздіксіз жүруін тоқтату қажет.

Коммуналдық қызмет өкілдері саяжай мен құрылыс алаңының жақын орналасуы қауіпті екенін жасырмайды. Оған қоса жол бойына жылдамдықты шектеу белгілері де орнатылмаған. Қазір жүк көліктерінің кесірінен жолдар бүлініп, автобустардың жүруі қиындады.

Елена Рядинских, автопарк директоры:

- Үлкен автобустардың мына жолда жүруі өте қиын әрі қауіпті. Жаңа қоғамдық көліктер бұзылса, оны жөндеу де арзанға шықпайтыны белгілі. Кемі 1 млн теңгеден басталады.

Қиыршықтас өндірушілердің айтылған уәжге келіспеске амалы жоқ. Өйткені тұрғындардың қойып отырған талабы да орынды.

Ирина Смит, Өскемен қаласы әкімінің орынбасары:

- Біз бұл мәселе бойынша келісімге келіп, жүк көліктерінің қозғалысын реттеуді жоспарлап отырмыз. Рас, қазір саяжай аумағында ауыр жүк көліктері қадағалаусыз жүріп жатыр.

Жауаптылардың сөзінше, енді саяжайды айналып өтетін техникалық жол қалыпқа келтіріледі. Ал тәртіп сақшылары жолдарға шектеу белгілерін орнатуды көздеп отыр.

Авторлары: Асланбек Шығыр, Вячеслав Ветлугин, Дмитрий Пыхтин