Астанада жаңа туған баланы заңсыз беру фактісі бойынша сот үкімі шықты. 19 жастағы қыз сәбиін жалған суррогат ана келісімі арқылы ерлі-зайыптыға ақша үшін бергені анықталды, деп хабарлайды Oinet.kz тілшісі.

Астана қаласының прокуратурасы жаңа туған нәрестені заңсыз беру ісі бойынша мемлекеттік айыптауды қолдады.

Тергеу барысында 19 жастағы елорда тұрғыны делдалдардың көмегімен жаңа туған сәбиін ерлі-зайыптыға бергені белгілі болды. Ол үшін жүктіліктің сегізінші айында жалған суррогат ана болу туралы келісімшарт жасалып, ақшалай сыйақы қарастырылған.

Соттың 2025 жылғы 23 мамырдағы үкімімен бойжеткен мен делдалдар Қазақстан Республикасы Қылмыстық кодексінің 135-бабы — "Кәмелетке толмағандар саудасы" бойынша кінәлі деп танылды.

Сот айыпталушыларға 8 жыл мерзімге шартты жаза тағайындап, пробациялық бақылау белгіледі.

Баланың құқықтары мен заңды мүддесін қорғау мақсатында сәби кәмелетке толмағандарға арналған арнайы мекемеге орналастырылды. Сонымен қатар Астана қаласы әкімдігінің мамандандырылған балалар үйінің талап-арызы негізінде анасы ата-ана құқығынан айырылды.

Астана қаласының прокуратурасы балаларға қатысты заңсыз мәмілелер қылмыстық жауапкершілікке әкелетінін және мұндай істер құқық қорғау органдарының ерекше бақылауында екенін ескертті.

Еске салайық, бұған дейін Алматы тұрғыны Кристина Гаврилюк қытайлық ерлі-зайыпты үшін суррогат ана болғанын, алайда олар шала туған сәбиден бас тартып, уәде етілген 7,5 миллион теңгені төлемей кеткенін айтқан еді. Әйелдің сөзінше, биологиялық ата-аналар ДНҚ сараптамасы арқылы баланың өздерінікі екенін растағанымен, кейін байланысқа шықпай қойған. Қазіргі таңда сәби балалар үйінде тәрбиеленіп жатыр.