Халықаралық балаларды қорғау күніне орай Жамбыл облысының барлық ауданы мен қалаларында 100-ден аса мерекелік шара өтіп, 4 мыңға жуық бала қамтылды, деп хабарлайды 24KZ. Солардың бірі Тараздағы демалыс кешенінде болды. Оқушыларға концерттік бағдарлама көрсетіліп, балалар шығармашылық байқауларда бақ сынап, көңіл көтерді.

Тараздық балалар үшін биыл балалар мерекесі «Зербұлақ» демалыс кешенінде ұйымдастырылды. Ерекше көңіл әлеуметтік осал топтардағы, мүмкіндігі шектеулі және көпбалалы отбасылардан шыққан балаларға бөлінді. Ұйымдастырушылар 60-тан аса жеткіншекті мереке қонағы етіп, шынайы шаттық пен көтеріңкі көңіл күй сыйлады.

Айжан Мейірханова, облыстық Білім басқармасының бөлім басшысы:

- Осындай іс-шаралар жыл сайын дәстүрлі түрде өтеді. Жыл сайын балалардың құқықтары тыңдалады, қорғалады. Сондықтан әрі қарай 1 маусымнан кейін жазғы демалыстар басталып кетеді. Оған жазғы демалыспен 7 мыңнан аса балалар қамтылады. Мемлекет тарапынан, облыс тарапынан балаларға жағдайдың бәрі жасалып жатыр.

Қалалық аквапарк аумағында балаларға арнап мерекелік концерт, шығармашылық байқаулар мен қолөнер көрмесі, шеберлік сабақтары ұйымдастырды. Сондай-ақ бүлдіршіндерге тегін балмұздақ таратылды.

Фатима Амангелді, оқушы:

- Кепкаға сурет салдық, тігін тігіп үйрендік, ойнадық. Ертегі кейіпкерлерімен билеп жарыстық. Маған қатты ұнады.

Кәусар Сержанқызы, оқушы:

- Өте қызықты аниматорлар шықты. Біз паркте суреттер салдық. Маған бүгінгі күн өте ұнады. Балалар мерекесі құтты болсын. Барлығына жақсылық тілеймін.

Оқушылар өздерін құттықтай келген ертегі кейіпкерлерімен би билеп, ойын ойнап көңіл көтерді. Көңілді бағдарламаны аквапарк әкімшілігі тегін ұйымдастырғанын айта кеткен жөн.

Айбек Оршубеков, аквапарк директоры, ұйымдастырушы:

- Бүгін, балалар күнінде аквапарк аумағындағы қызметтің бәрін тегін пайдалануға болады. Түрлі жарыстарға қатысып, сыйлықтар ұтып алуға мүмкіндік жасадық. Мерекелік бағдарлама таңғы сағат 10:00-ден бастап кешкі 20:00-ге дейін жалғасады. Компаниямыздың атынан барлық баланы мерекемен құттықтаймын. Бақытты балалық шақ тілеймін.

Мерекелік шара соңында балаларға естелік сыйлықтар табысталып, ыстық ас берілді. Жалпы облыс бойынша 100-ден аса шара өтіп, 4 мыңға жуық бала мерекелік көңіл көңіл күйге бөленді.

Авторлары: Мерей Бает, Бақытжан Бапаев, Елдар Байділдә