Бұл туралы Ресейдің Қорғаныс министрлігі мәлімдеді.

Бүгінде ядролық күштерді даярлау және қолдану бойынша ауқымды әскери оқу-жаттығу басталып кеткен, деп хабарлайды inbusiness.kz сайты.

Ведомство оқу-жаттығуға 64 мыңнан аса әскери қызметкер мен 8000 мыңға жуық қару-жарақ, әскери және арнайы техника тартылатынын мәлім етті. Оған стратегиялық мақсаттағы зымыран әскерлері, Солтүстік және Тынық мұхиты флоттары, алыс қашықтықтағы авиация қолбасшылығы, Ленинград және Орталық әскери округтерінің бірқатар бөлімдері қатысады.

Ресей Қорғаныс министрлігі оқу-жаттығу барысында ядролық күштердің жекелеген бөлімдері мен құрамаларын жауынгерлік тапсырмаларды орындауға әзірлеу және оларды жан-жақты қамтамасыз ету шаралары пысықталатынын айтты. Сонымен қатар, Ресей аумағындағы полигондарда баллистикалық және қанатты зымырандарды ұшыру жоспарланып отыр.

Әскери ведомство Беларусь аумағында орналастырылған ядролық қаруды бірлесіп даярлау және қолдану мәселелері де пысықталатынын хабардар еткен.

Оқу-жаттығудың негізгі мақсаты – агрессияның алдын алу міндеттерін орындайтын әскери басқару органдары мен әскердің дайындық деңгейін тексеру, сондай-ақ бөлімдердің жүктелген міндеттерді орындау қабілетін бағалау.

Мұнан бөлек, командалық және жедел құрамның машығын жетілдіру, ықтимал қарсыласты тежеу шараларын әзірлеу кезінде бағынысты әскерлерді басқару жүйесін пысықтау, сонымен қатар өзара іс-қимыл мен қамтамасыз ету жұмыстарын үйлестіру де көзделген.

Еске салайық, Ресей осыған дейін де стратегиялық ядролық күштердің оқу-жаттығуларын өткізген. Дәлірек айтқанда, 2025 жылдың қазан айында құрлықаралық баллистикалық және әуе базасындағы қанатты зымырандарды тәжірибелік ұшыру жүзеге асырылған болатын.

Ал 2024 жылдың көктемі мен жазында тактикалық ядролық қаруды даярлау және қолдану бойынша оқу-жаттығулар өткен. Сол кезде Кремль бұл шараларды Батыс елдері басшыларының Украинаға әскер жіберу жөніндегі мәлімдемелерімен байланыстырған еді.