Тарихи деректер Алтын Ордада тиімді іс жүргізу жүйесі қалыптасқанын дәлелдейді.

Мемлекет басшысы Қасым-Жомарт Тоқаев халықаралық симпозиумда сөйлеген сөзінде Алтын Орданың мемлекеттік басқару жүйесі өз дәуірі үшін озық үлгі болғанын атап өтті, деп хабарлайды inbusiness.kz сайты.

Президенттің айтуынша, тарихи деректер Алтын Ордада тиімді іс жүргізу жүйесі қалыптасқанын дәлелдейді. Сонымен қатар Құрылтай институты дала демократиясының ерекше тетігі ретінде маңызды рөл атқарған.

– Ұлыста әлеуметтік құрылым нақты жүйеленгенімен, қоғамда әділдік қағидасы басты орынға шықты. Әскер мен мемлекеттік басқару ісінде темірдей тәртіп, адал қызмет және меритократия принциптері қатаң сақталды. Бұл түрлі этнос пен әлеуметтік топ өкілдеріне тең мүмкіндік берді, – деді Қасым-Жомарт Тоқаев.

Мемлекет басшысы сауатты ішкі және сыртқы саясаттың арқасында Алтын Ордада тұрақтылық сақталып, мемлекеттің қуаты арта түскенін айтты. Оның сөзінше, Алтын Орда Мысыр мәмлүктерімен, Ватиканмен, Византиямен, Осман империясымен және Еуропа мемлекеттерімен белсенді дипломатиялық байланыс орнатқан.

Президент сондай-ақ тарихта "Ұлы дүрбелең" атауымен қалған саяси дағдарыс кезеңінде де Алтын Орданың басқару жүйесі тұрақтылығын жоғалтпағанын ерекше атап өтті. Бұл басқару үлгісі кейін Еуразия кеңістігіндегі көптеген мемлекеттерге негіз болғаны айтылды.