Мәжіліс депутаты Дәулет Мұқаев жұбайының туған күніне "Парламент атынан" арнайы құттықтау адресатын жасап, табыстаған, — деп хабарлайды Massaget.kz тілшісі.

Видео әлеуметтік желіде депутаттың жеке парақшасында жарияланған.

"Депутаттықты жалпағынан басып, неше түрлі дүниені де істеуге болады. Бірақ арым, ұятым көп нәрсеге жеткізбейді. Тіпті қарапайым ғана нәрсе: шопырмен көлік беріледі. Қызмет жасап жатқаныма үш жыл болды. Менің әйелім де, бала-шағам да ол көлікке әлі отырып көрген жоқ. ...Бұл — мемлекеттің көлігі. Шыны керек, Парламентте мұндай нәрсені (құттықтау хатты — еск.) өзіміз сатып алып жасатамыз. Өзіміз мәтінін жазып, ресми құттықтауларға, іс-шараларға алып барамыз. Лаура 30 жасқа толған кезде "маған осындай жазып берші" деген, "иә, иә" деп қойдым. "Ол Парламент қой, біртүрлі ғой" дедім. Одан кейін 31-ге толды. Биыл 32. Білесіздер, Парламент те жайлап тарайын деп жатыр. Жарайды, қолымда тұрған нәрсе ғой, 5000 теңгесін төлеп, өзімнің жүрекжарды тілегімді арнайын, жазайын деп жазып алып келдім", — дейді видеода депутат.

Посмотреть эту публикацию в Instagram

Публикация от Даулет Мукаев (@daulet_mukayev)

Видео әлеуметтік желіде қызу талқыланып, жұрттың пікірі екіге бөлінді. Желі қолданушылары арасында депутат пен жұбайын құттықтағандар да, Дәулет Мұқаевтың бұл әрекетін сынағандар да табылған:

"Бақыттарың ұзағынан болғай", "Туған күні құтты болсын! Бақытты болыңдар!", "Ресми құттықтау өзім білемін деген депутаттардың ойыншығы болды-ау", "Дәулеттің депутаттыққа дейінгі кезі қайда жақсы ма еді деп ойлаймын", "Депутат ретінде жалпағынан басып, неше түрлі нәрсе істеуге болады" дегенді қалай түсінеміз?", "Ардақ анасын, Дәулет әйелін, келесі депутат кім екен құттықтайтын?!"

Кейінірек депутаттың өзі оқырманының пікіріне "ресми құттықтау бұндай болмайды", — деп жауап қатқан.

instagram.com/daulet_mukayev/

Айта кетейік, қазір Қазақстанның жаңа Парламенті, яғни Құрылтайға, депутаттардың мәртебесіне, олардың құқығы мен міндетіне қатысты заң жобасы қаралып жатыр.

Instagram парақшамызға жазылып, ең қызықты ақпараттарды бірінші болып оқыңыз!