12–25 мамыр аралығында ҚР ҰҚК Шекара қызметінің Әскери-патриоттық қызмет басқармасының ұйымдастыруымен алғаш рет шекара маңы өңірлерінде тұратын балалар арасында «Шекара мұрагері» атты бейнероликтер байқауы өткізілді. Байқау сәтті аяқталып, жеңімпаздар арнайы марапатталды.

Байқаудың мақсаты – шекара маңындағы аймақтардың өмірі мен маңыздылығына назар аударту, сол өңірлерде тұратын балалардың көзқарасы арқылы туған жерге деген сүйіспеншілік пен шекарашы мамандығына деген құрметті қалыптастыру.

Байқауға 14 мектеп оқушысы қатысты. Олардың ата-аналары әскери салада қызмет етпесе де, балалардың шекара қызметіне деген қызығушылығы мен патриоттық көзқарасы байқауда айқын көрініс тапты.

Байқау жеңімпаздарын марапаттау рәсімі ҚР ҰҚК Шекара қызметінің ұйымдастыруымен өтті. Аталған іс-шараға жуырда Астана қаласындағы 16 орта білім беру мекемесінде ашылған «Жас шекарашы» сыныбының оқушылары да арнайы шақырылды.

Бұл сыныптың ашылуына да тікелей бастамашы болған – Әскери-патриоттық қызмет басқармасы. Сонымен қатар, ардагер шекарашылар ұйымы – «Застава тарландары» қоғамдық бірлестігі сыныптың материалдық-техникалық жабдықталуына демеушілік көрсетіп, оқушылармен алдағы уақытта тұрақты әскери-патриоттық жұмыстар жүргізуді жоспарлап отыр.

Мемлекет басшысы Ұлттық құрылтайдың IV отырысында атап өткендей, шекара маңындағы аудандарды дамыту – ел қауіпсіздігінің маңызды бөлігі. Осы бағыттағы бастамалар – шекаралық елді мекендердегі жас ұрпақтың саналы азамат болып қалыптасуына үлкен үлес қосады.