Панфиловшы батырлар шыңына (4120 м) ұйымдастырылған жаппай альпиниада кезінде 18 жастағы қатысушының жағдайы нашарлаған.

Алдын ала мәлімет бойынша оған жедел тау ауруы мен өкпенің ісінуі диагноз қойылған, деп жазады inbusiness.kz сайты.

"Зардап шеккен азаматқа Алматы қаласы ТЖД Құтқару қызметі құтқарушылары жедел түрде көмек көрсетіп, оны Мәншүк Мәметова атындағы №6 мореналық көл аумағына дейін түсірді. Одан әрі азаматты эвакуациялау үшін ТЖМ "Барыс" республикалық жедел-құтқару жасағының құтқарушылары мен ТЖМ "Қазавиақұтқару" тікұшағы жұмылдырылды", – делінген ҚР Төтенше жағдайлар министрлігінің хабарламасында.

Халі күрт нашарлаған альпинист "Медеу" тікұшақ алаңына, сонан соң Апаттар медицинасы орталығының қызметкерлерімен емдеу үшін №12 қалалық клиникалық ауруханаға жеткізілген.