Бұл туралы Бас прокуратура хабарлады.

Қазақстанның Бас прокуроры Берік Асылов "Alsera KZ" ЖШС-нің директоры Гюнай Гокалпты қабылдады, деп хабарлайды inbusiness.kz сайты.

Компания – 7 түрлі салада жұмыс істейтін және 7,5 мың қызметкерді біріктіретін "Alarko Holding A.S." түрік кәсіпорнының еншілес ұйымы.

– Әңгімелесу барысында инвестор жалпы инвестиция сомасы 650 миллион АҚШ долларын құрайтын Шымкент қаласында орналасқан заманауи жылыжай кешенін салу және пайдалану жобасын ұсынды.

Жоба жыл бойы көкөніс өндіруге бағытталған және жоғары әлеуметтік-экономикалық әлеуетке ие. Ол жаңа жұмыс орындарын құруға, озық агротехнологияларды енгізуге және елдің азық-түлік қауіпсіздігін нығайтуға мүмкіндік береді, – делінген хабарламада.

Сонымен қатар, қос тарап шетелдік экспорттаушыларға оңайлатылған рұқсат беру рәсімдеріне байланысты отандық ауыл шаруашылығы өнімдерін өндірушілер үшін туындайтын экономикалық тәуекелдерді талқылады.

Инвестор жобаны барлық кезеңде сүйемелдеуді қамтамасыз ететін Бас прокуратураның Инвесторлардың құқықтарын қорғау комитеті және аумақтық прокуратура органдарымен өзара іс-қимылдың оң тәжірибесін атап өтті.

Өз кезегінде Берік Асылов инвесторлардың құқықтарын қорғау негізгі басымдық болып қала беретінін жеткізді. Комитет бизнестің үндеулеріне жедел ден қоюды, құқықтық сүйемелдеуді және әкімшілік кедергілерді жоюды қамтамасыз етеді.

Бас прокурордың сөзінше, белсенді қадағалау және тәуекелдердің цифрлық мониторингі тетіктерін енгізу Қазақстанда тұрақты және болжамды инвестициялық орта қалыптастырады.

Кездесу қорытындысында инвестор көтерген мәселелерді мемлекеттік органдармен бірлесіп зерделеу және бизнес пен ұлттық экономика мүдделерінің теңгерімін қамтамасыз ететін жүйелік шешімдерді әзірлеу тапсырылды.