Семейде «Таза Қазақстан» акциясы аясында жоғарғы оқу орындары мен колледждердің студенттері Ертіс өзенінің жағалауын қоқыстан арылтты. Жалпы жыл басынан бері белсенді түрде өткізіліп келе жатқан тазалық шарасында 1777 саябақ пен сквер, 733 ескерткіштің аумағы тазартылған. Елді мекендер аумағында 46 мыңға жуық ағаш отырғызылған.

Өрлеубек Ерсінбек, «Абай жастары» жастар ресурстық орталығының бөлім басшысы:

Облысымызда 150 мыңға жуық жас бар. Барлығы да осы сенбілік жұмыстарына ат салысуға тырысады. Жыл басталғалы бері әр сенбі сайын өңіріміздің аудандарында, Семей қаласында көптеген жастарымыз алдыңғы қатарда жүріп, өздерінің белсенділіктерін танытып, өңірімізді таза ұстауға өз үлестерін қосып жатыр.

Ал Шымкент қаласында «Таза бейсенбі» шарасына қатысқан 70-тен астам азамат Еңбекші ауданы аумағын қоқыстан тазартып, қураған шөптерді жинап шықты. Көше бойлары мен аяқжолдарды сыпырып, оның бойындағы ағаштарды қырқып ретке келтірді. Сондай-ақ Шымкент каналаның арнасында шашылған тұрмыстық қалдықтарды терді. Аумақтан 3 тонна қоқыс шығарылды.

Мақсат Жолдасбеков, «Amanat» партиясы Еңбекші аудандық филиалының атқарушы хатшысы:

Тұрғындардың барлығы өздері жиналып, құрал-саймандарымен, техникаларымен шығып, қоқыстарды сыртқа шығаруға, арық-атыздарды аршуға, барлығына шығып жатады. Сол себепті акцияның берері мол болды және азаматтардың қаламызды таза ұстауға деген көзқарасы өсіп келе жатыр.

Ержан Жақып

Ғани Қалмаханов