Samruk-Kazyna Trust қоры биыл 1 миллион қазақстандыққа қолдау көрсетті.
Жалпы құны 8,8 млрд теңгеге тең 35 әлеуметтік бастама іске асты. Жобалардың басым бөлігі медицина, білім беру, спорт, мәдениет және инклюзия секілді негізгі бағыттарды қамтыды.
"Самұрық-Қазына" АҚ компаниялар тобы атынан қайырымдылық жобаларымен айналысатын Samruk-Kazyna Trust қоры дәстүрге сай жылды қорытындылау іс-шарасын өткізді. "Қайырымдылық. Сенім. Серіктестік" атты жиынға ерекше балалардың ата-аналары бас қосты. Тағдыр сынына мойымаған жандар бүлдіршіндерді сауықтыру, оларды қоғамға бейімдеу тақырыбында өз ойларын ортаға салды.
Зәуре Итенова, "ДЦП-Life" жеке қорының директоры:
- Мен негізі мұнда тек қатысушы ғана емес, спикер ретінде де келіп отырмын. Өз жобамның нәтижесін айту үшін. Жалпы жоспармен емес, жүрек қалауымен шыққан бұл жоба "Шексіз мүмкіндіктер" инклюзивті спорттық лагері" ерекше қажеттілігі бар балаларға арналған. Лагерьде жылына біз 4-5 маусым өткіземіз. 50 ерекше бала мен 50 ата-ана келеді. Соған біз 50 еріктіні жұмылдырамыз.
Қор ерекше білім беру қажеттіліктері бар балаларға тең мүмкіндіктер қалыптастыруға қолайлы жағдай жасап келеді. Бір Жыл ішінде Астана қаласының, Ақмола және Атырау облыстарының мектептерінде инклюзияны қолдауға бағытталған 17 кабинет ашылды. Нәтижесінде 1500 ерекше оқушы қатарластарымен бірге дамуға және қоғамға бейімделуге мүмкіндік алды.
Альфия Адиева, Samruk-Kazyna Trust қорының бас директоры:
- Биылғы жұмысшылар жылы аясында "Samruk Umiti" деген жобамыз халыққа жол тартқан болатын. Мақсаты — ата-ана қамқорлығынан айырылған балаларға қамқорлық таныту. ШҚО мен Павлодардан 100-ге жуық баланы алдық. Олар 8-9 сынып оқушылары. 39 бала жұмысшы мамандықты таңдап, колледжге түсті.
Болашақта үздік түлектер "Самұрық-Қазына" АҚ компаниялар тобына жұмысқа орналаса алады. Ал "Туған елге саяхат" балалар туристік жобасы кәсіптік бағдар беру, робототехника және білім беру сапарларын біріктіріп, 400 оқушыны қамтыды. 2026 жылы Жаңаөзен қаласында кітапхана, Доссор кентінде музей-кітапхана, Құлсары қаласында дене шынықтыру-сауықтыру кешенін ашу жоспарланған. Сондай-ақ Абай, Ұлытау және Қостанай облыстарында спорт кешендері пайдалануға берілмек.
Мирлан Алтынбек, Марат Диханбаев, Ислам Маханбет
