Талдықорған қаласының тұрғыны халқымыздың көне аспаздық дәстүрін жаңғыртып жатыр.

Ерболат Еренталов есімді жас наубайшы көкөністен жасалған табиғи ашытқыны қолданып, нан салады. Айрықша мәзірдің машақаты мол болса да, адам денсаулығы үшін пайдасы көп,- дейді ол.

Нан өндірісімен айналысу Ерболат Еренталовтың көптен бері көкейінде жүрген арманы. Мақсатына жету үшін ол жарты жыл бойы Алматыда арнайы білім алып, тәжірбие жинаған. Саланың қыр-сырына қаныққан соң туған жеріне келіп наубайхана ашты.

Ерболат Еренталов, наубайшы:

- Таза табиғи нанды жасау өнер деп есептеймін. Әр нанды қолмен мәпелеп өсіреміз. Өндіреміз. Дайын смесьтер жоқ. Формовкасын да қолмен жасаймыз. Бұл адал жұмыс сол үшін нан шығаруға келдім. Басты менің мақсатым қолжетімді қалып жасау.

Жас кәсіпкердің бұл істі қолға алғанына алты айға жуықтады. Қазір ол жұмысын жүйеге келтіріп, бес адамды тұрақты жұмыспен қамтып отыр.

Николай Сёмычкин, жұмысшы:

- Бұл салада алғаш рет жұмыс істеп жатырмын. Негізгі міндетім нан пісіру. Сондықтан үнемі пешке қарап нан қызарған сәтінде шығарып отырамын. Қазір осы кәсіпті үйрену үстіндемін. Себебі бұл істе бәрі тәжірибемен келеді.

Наубайханада күн сайын 10 түрлі нан пісіріліп, қалалық дүкендерге жеткізіледі. Тұтынушыларға табиғи тағам ұсынып отырған жастың арманы асқақ.

Ерболат Еренталов, наубайханашы:

- Қазір бұл цехта тәжірбие жинап жатырмыз. Өзіміздің адамдарды үйретіп жатырмыз. Бірақ менің басты арманым табиғи нанды бүкіл Қазақстанға көрсету және ұсыну. Сол үшін келешекте неше түрлі мемлекеттік бағдарламаларға қатысуға ниеттеніп отырмын.

Жетісу облысында 62 мыңнан астам шағын және орта кәсіпкерлік нысаны жұмыс істейді. Онда 100 мыңнан аса адам еңбек етіп, саланың дамуына өз үлесін қосып келеді.

Авторлары: Шыңғыс Қалиден, Қуаныш Түргенбаев