Маңғыстау атом энергетикалық комбинаты салықтан босатылады.
Бүгін Мәжіліс депутаттары тиісті заң жобасын екінші оқылымда қабылдады. Яғни бұл кәсіпорын 2029 жылға дейін мемлекет бөлген субсидия үшін қазынаға салық төлемейді. Бұған дейін коммуналдық мекемеге көрсетілген қаржылық қолдау үшін сол соманың 20 пайызын табыс салығы ретінде кері қайтаратын. Енді салық кодексіне енгізілген бұл түзетуден кейін ақшаның барлығы МАЭК-тегі инфрақұрылым мәселесін шешуге жұмсалмақ.
Маңғаз Маңғыстаудағы атом энергетикалық комбинаты қарызға белшесінен батқан. Мекеме бір ғана газ тарату компаниясына 20 млрд теңге берешек екен. Коммуналдық кәсіпорынның бұндай мүшкіл жағдайына депутаттар да шүйлігіп отыр
Еркін Әбіл, ҚР Парламенті Мәжілісінің депутаты:
- Былтыр Үкімет резервінен бұл мекемеге 5 млрд, биыл да 5 млрд теңге бөлінді. Кәсіпорында неге қаржылық қиындықтар туындап отыр? Сауықтыру жөнінде бір нақты жоспар бар ма? Әлде біз жыл сайын бюджеттен қаржы бөліп қарызды өтейміз ба?
Энергетика министрлігі өкілдерінің сөзінше, қарыздың осыншама көп көлемде болуына жылу энергиясы мен су бойынша тарифтерді тежеу себеп. Яғни мекеме табыс емес, шығын көріп отыр. Оның үстіне тұтынушылардың МАЭК-ке қарызын уақытылы төлемеуі де жығылғанға жұдырық болып отыр. Қазір абоненттердің кәсіпорын алдындағы берешегі 18 млрд теңгеге жетеді.
Сұңғат Есімханов, ҚР Энергетика вице-министрі:
- Соңғы 2 жылда бұл мәселе бойынша біз ұлттық экономика министрлігіндегі әріптестерімізбен бірге жұмысты жасап келеміз. Қазір МАЭК-тің жөндеу қорын 2023 жылғы 6 млрд теңгеден 2025 жылы 15 млрд теңгеге дейін ұлғайттық. Бұл кәсіпорынның тұрақты жұмысын қамтамасыз етіп, табысының артуына мүмкіндік береді. Бүгінде мекемеде қуаты 160 мегаватт болатын бу газы қондырғысы салынуда. Ол шығынды азайтып, табысты көбейтуге сеп болады. Нысанды 2027 жылдың бірінші жартысында пайдалануға беруді күтіп отырмыз. Сондықтан жыл сайын қосымша қаржы бөлу қарастырылмаған.
Өлместің күнін кешіп жатқан кәсіпорынға көмек. Бүгін Мәжіліс депутаттары МАЭК-ты салықтан босататын заң жобасын қабылдады. Яғни мекеме мемлекет бөлген субсидиядан енді табыс салығын төлемейді. Бұл қаржы инфрақұрылымды жақсарту мен қаржылық қиындықтан шығу үшін жұмсалмақ.
Еділ Жаңбыршин, ҚР Парламенті Мәжілісінің депутаты:
- Мемлекет өзі мемлекеттік компанияға береді көмекті. Бірақ соның 20 пайызын салық күйінде кері алып кетеді. Сондықтан берілген ақша толықтай қарыздарды жабуға, немесе өзінің жабдықтарын жөндеуге толық жұмсалуы үшін біз айтып отырған салықты алып тастау отырмыз. Себебі ол мемлекеттің мекемесі, мемлекеттің ақшасы. Сондықтан ол сол жерде толық тиімді жұмсалуы тиіс.
Айта кету керек, МАЭК-ты субсидиядан түскен ақша үшін салық төлеуден босату уақытша шара. Ол 2029 жылдың бірінші қаңтарына дейін жұмыс істейді. Бұл түзету жаңа салық кодексінде де көрініс тапқан.
Риат Шони, Мұрат Әріпханов
