Қазақстанда ЖРВИ мен Гонконг тұмауына шалдыққандардың саны қарқынды өсуде. 8 мыңнан астам адам ауруханаға жатқызылған, олардың басым бөлігі балалар. Денсаулық сақтау жүйесі аталмыш эпидемияға қаншалықты дайын? Сaravan.kz медиа порталының тілшісі елдегі эпидемиологиялық жағдай туралы анықтады.

Ресми статистика

Денсаулық сақтау министрлігінің мәліметінше, осы жылдың 1 қыркүйегінен бастап Қазақстанда жұқпалы респираторлық вирустық инфекциялармен ауыратындардың саны шамамен 1,5 миллион адамға жеткен. Бұл үлкен көрсеткіш, алайда дәрігерлер бастапқыда еш алаңдамаған. Өйткені өткен жылы осы кезеңде көрсеткіш одан да жоғары болған. Алайда соңғы күндері жағдай күрт өзгерді. Бұл туралы министр Ақмарал Әлназарова мәлімдеді.

«Осы аптада және келесі аптада әлі де күн жылы болады. Желтоқсанның ортасына дейін инфекция өршуі тіркеледі деп болжап отырмыз. Сондықтан адам көп жиналатын жерлерден аулақ болу, қолды жуу, үйді желдету, бетперде тағу ұсынылады», – деді Әлназарова Сенат дәлізінде.

Гонконг тұмауы Қазақстан үшін жаңа вирус емес. Оның өршуі елде 2001 жылдан бері тіркеліп келеді. Дегенмен ол әлі де қауіпті болып саналады, себебі тыныс алу жолдарымен қатар асқорыту жүйесін де зақымдайды.

Кез келген вирус инфекциясы сияқты Гонконг тұмауы да кенеттен басталады. Бірден қызу көтеріліп, адамның жағдайы нашарлайды. Бұлшық еттерде ауырсыну пайда болады.

Қазіргі уақытта Қазақстанда 8 мыңнан астам адам ауруханаға жатқызылған, оның 7 мыңы балалар. Дегенмен Денсаулық сақтау министрлігінің айтуынша, Қазақстанда жаңа және тіркелмеген тұмау түрлері анықталмаған.

Денсаулық сақтау жүйесінің жағдайы

Анықталған вирустар ағымдағы маусымның вакциналық штамдарына толық сәйкес келеді. Дегенмен, эпидемиологиялық кезеңде денсаулық сақтау жүйесі орташа деңгейден әлдеқайда жоғары жүктемеде жұмыс істеуде. Мысалы, республикадағы медициналық мекемелердің төсек қоры 80%-ға толған.

Маусымдық аурушаңдықты ескере отырып, алғашқы медициналық-санитарлық көмектің жұмысы күшейтілді. Атап айтқанда поликлиникалар мен тексеру кабинеттері күшейтілген жұмыс кестесіне көшті, санитарлық-эпидемиологиялық талаптар сақталады, медициналық қызметкерлерге бетперде тағу міндеттелді. Амбулаторлық деңгейде шамамен 80% пациент ем алуда.

Балалар арасындағы аурушаңдық

Бүгінде барлық науқастардың 66%-ы 14 жасқа дейінгі балалар. Соңғы аптада мектеп оқушылары арасында 6 мыңнан астам ЖРВИ және 13 тұмау жағдайы тіркелді. Сол себепті республика бойынша 1000-жуық сынып қашықтан оқытуға көшірілді.

Астанада санитарлық дәрігерлер жаңа эпидемиологиялық шектеулер енгізе бастады. Қалада тексеру кабинеттерінің жұмысы күшейтілді, мектептерде көпшілік іс-шараларға тыйым салынды, поликлиникалардың жұмыс уақыты 20:00-ге дейін ұзартылды. Шаралар эпидемиологиялық жағдай тұрақталғанға дейін қолданылады.

Мамандар мұндай шараларды дұрыс деп бағалайды. Бұл алдын алу мақсатындағы іс-шара, өйткені екі апта осындай шектеулер вирустың жаңа адамға берілу тізбегін үзуге жеткілікті.

Медицина сарапшысы Рафаиль Қыпшақбаевтың айтуынша, біртекті емдеу кеңесі жоқ. Бірақ, міндетті түрде дәрігерге қаралып, қажет препараттарды алу дұрыс.

«Мысалы, Танфлекс немесе Муканекс тиімді деп айтсақ, адамдар оларды жаппай сатып алуға жүгіреді. Сондықтан өте сақ болу керек. Өзіңді емдеуден бас тартқан дұрыс. Барлығымыз ақылдымыз, бірақ қаншама жыл оқыған дәрігер сіз өзіңізді ауыр дәрілермен емделу үшін оқыған жоқ», — дейді маман.

Мектептер онлайнға көшірілуде

Астанада ЖРВИ мен тұмаудың күрт өсуіне байланысты санитарлық талаптар күшейтілді. Басты санитарлық дәрігер қаулыға қол қойды. Мектептерде оқушылар мен қызметкерлер үшін күнделікті «таңғы тексеру» енгізілді, сыныптарда аурушаңдық 30%-дан асқан жағдайда қашықтан оқыту қарастырылған.

Жағдай әлі де ауыр. Соңғы аптада Астанада 23 000-нан астам ЖРВИ жағдайы тіркелді, бұл бір апта бұрынғы көрсеткіштен 1,5 есе көп. Вирус оқу процесіне түзетулер енгізіп жатыр. Өңірлерде мектептер онлайнға көшті: Жамбыл облысында — 598, Абай облысында — 276, Шығыс Қазақстан облысында — 204, Астанада — 182, Қостанай облысында — 168, Ақмола облысында — 21, Қарағанды облысында — 20.

Ережеге сәйкес, бір сыныптағы 30%-дан астам бала ауырып қалса, оқу автоматты түрде онлайнға өтеді. Мектептің толық жабылуы тек өңірдің басты санитарлық дәрігерінің шешімімен жүзеге асады.