Алматы облысындағы мектеп бітіру кешінде орын алған қайғылы оқиғаға байланысты кәмелетке толмаған жасөспірім екі ай мерзімге қамауға алынды. Бұл туралы Ішкі істер министрінің орынбасары Санжар Әділов мәлімдеді, деп хабарлайды Skifnews.kz ақпараттық порталы.

«Қылмыстық кодекстің «қасақана адам өлтіру» бабымен іс қозғалды. Сот шешімімен күдікті жасөспірім екі айға қамауға алынды. Қазіргі таңда тергеу жалғасып жатыр», – деді вице-министр.

Әділовтің айтуынша, тергеушілер Қылмыстық-процестік кодекстің 200-бабы негізінде жергілікті атқарушы органдарға тиісті ұсыныстар жолдаған. Оқиғаға байланысты білім мекемесінің басшылығы да жауапкершілікке тартылды. Мектеп директоры қызметінен босатылып, орынбасары мен екі сынып жетекшісіне қатаң сөгіс жарияланған.

Аталған оқиға Қаскелең қаласында мектеп түлектеріне арналған кеш кезінде болған. Ата-аналар мерекені ұйымдастыру үшін коттедж жалдаған. Сол жерде оқушылар арасында туындаған жанжал соңы қасіретке ұласқан: бір жасөспірім өз сыныптасын кәуапқа арналған темір шанышқымен жарақаттап, салдарынан жәбірленуші оқиға орнында көз жұмған. Облыстық полиция департаментінің дерегінше, марқұмның сыныптасы күдікті ретінде ұсталған.

Құқық қорғау органдары қазіргі уақытта істің мән-жайын жан-жақты тексеріп жатыр.