Қазақ тазысының сапасын арттыру қажет.

Ол үшін сан ғасырдан келе жатқан табиғи сұрыптаудан өткізу маңызды. Бүгін осы мақсатта «Қазақстан кинологтар одағы» тазы тұқымына арналған аңшылық сынақтар өткізді. Мамандар даладағы жарыс арқылы құмайдың аңшылық қарымын бағалады.

Тазының тұқымы былғанбаған болуы керек. Болмысы бөлек жануарды сынаған мамандар осылай дейді. Ол жаратылысынан алғыр, аңшылық иті. Тазыны қазақ ежелден «жеті қазынаның» біріне теліп, басқа иттерден ерекшелей түсті. Төрешілер бүгінгі сынаққа қатысқан тазылардан да сол сырттандықты іздеді. Сымбатына сай алғырлығы, жыртқыштан сескенбейтін қылығын байқап бақты. Ендігі мақсат «саннан сапаға» көшсек дейді.

Әділхан Төкенов, төреші:

- Тазының жалпы санына қазір ешқандай қауіп төніп тұрған жоқ. Саны жеткілікті, енді саннан сапаға өту. Бүгінгі іріктеуден өткен тазылар ертең асыл тұқымды өндіріске өтеді.

Бауыржан Серікқалиев, Қазақстан кинологтар одағының президенті:

- Негізі елімізде тазы жеткілікті. Енді тазы мойындалғаннан кейін тұқымын жақсартуымыз керек. Сол мақсатта біз қазір сапаға жұмыс істейтін тиісті бағдарламар қабылдап іске асырып жатырмыз. Тазының індеті аңшылық. Кезінде ата-бабаларымыз итті іріктегенде дәл осы қасиетті бірінші орынға қойған. Оны ұмытпауымыз керек. Ұрпаққа жеткізу керек.

Даладағы сынаққа еліміздің әр өңірінен 20 қазақы тазы қатысты. Тазы қырағы, қыр астында қыбыр еткен түз тағысын көзі шалады, әрі жүйрік келеді. Бүгінгі төрешілер де дәстүрден айнымай, иттердің жылдамдығы, төзімі мен аң қуу шеберлігін бағалады.

Мейірхан Смағұлов, тазы иесі:

- Жалпы мезгілде аңшылықта сынаймыз. Иіс алдырып, із кесіп, сонысымен тазы өзінің бойындағы бар өнерін көрсетеді. Бұл сырттан енді ғана ауызданып, өнер көрсетіп жүр.

Қазақстан кинологтар одағы алдағы мұндай шараларды елдің өзге де өңірлерінде өткізуді жоспарлап отыр. Себебі тұрақты сынақ тазы тұқымын асылдандыра түседі, дейді.

Айнұр Қуатқызы, Жарқын Өрден