Алматыдағы ботаника бағында нимфея гүлі қауыз ашты, деп хабарлайды 24kz.

Сабағы ұзын, тамыры тереңге жайылған көпжылдық су өсімдігінің қазақша ғылыми атауы – тұңғиық. Ол судың лай қабатына бекіп өседі. Үлкен жапырақтары мен гүлі судың бетінде қалқып тұрады.

«Ерекше өсімдіктің гүлдеу кезеңі күн суығанша жалғасады», — дейді мамандар. Бірақ әр гүл бар болғаны 3-4 күн ғана өмір сүреді екен. Кешке қарай күлтелер жабылып, гүлсабақ қысқарып, гүлді су астына тартады. Таңертең күлтесі қайта ашылады. Ботаникалық баққа тұңғиық гүлдері бес жыл бұрын жасанды тоғанға отырғызылған.

Жұлдыз Изатулла, ботаника бағының ғылыми қызметкері:

- Қазіргі кезде бізде Wyson Session, Black Princess, Grex Orange Pink, Attractions сынды сорттар белгілі. Бұл сорттардың барлығы өзіндік ерекшелігі бар. Жаңағы түсінің алуандылығымен, гүлінің формасымен ерекшеленеді. Қазақстан аумағында тұңғиықтар негізінен Батыс өңірінде Жайық өзенінің аңғарында кездеседі. Сирек түрде Қазақстанның кейбір жерлерінде таралған. Яғни, бұл ақ тұңғиық Қазақстанның Қызыл кітабына енгізілген.