Мемлекеттік кеңесші Ерлан Қариннің төрағалығымен Шетелде кадрлар даярлау жөніндегі республикалық комиссияның кезекті отырысы өтті, деп хабарлайды 24kz.

Жиын барысында 189 азаматқа «Болашақ» халықаралық стипендиясын тағайындау туралы шешім қабылданды. Биыл конкурстық іріктеу жаңа ережеге сай кезең-кезеңімен өтті. Оның аясында кешенді тестілеу және жеке сұхбаттар жүргізілді. Стипендия иегерлерінің 164-і магистратурада, 10-ы докторантурада оқиды. Сондай-ақ 15 азамат әлемнің ең үздік университеттері мен орталықтарында кәсіби тағылымдамадан өтеді. Комиссия мүшелері басымдық беріліп отырған мамандықтарға ерекше назар аударды. Яғни, стипендия иегерлерінің 73%-і жаратылыстану-техникалық, қалғаны әлеуметтік-гуманитарлық бағыттар бойынша білімін жетілдіреді. Сондай-ақ отырыста елдің атом энергетикасы саласына қажетті кадрлар даярлау мәселесі қаралды. Жиын соңында Мемлекеттік кеңесшісі Ерлан Қарин «Болашақ» халықаралық стипендиясын одан әрі жүзеге асыруға және жетілдіруге қатысты нақты тапсырмалар берді.