Астанада ақылы автотұрақ жүйесіне өзгерістер енгізіледі. Қала әкімі Жеңіс Қасымбек депутаттық сауалға жауап берді, — деп хабарлайды Massaget.kz тілшісі.

Қалада шлагбаум орнатылған жаңа үлгідегі ақылы тұрақтар пайда болады. Мұнда көліктің кіріп-шығуын автоматты түрде тіркейтін бейнебақылау камералары орнатылады. Жаңа жүйенің басты ерекшелігі — минуттық төлем. Яғни жүргізушілер нақты тұрақта тұрған уақыты үшін ғана төлейді.

Сонымен қатар, коммуналдық ашық тұрақтарға да заманауи камералар мен төлем жүйелері орнатылмақ, бірақ бұл инфрақұрылым сай келетін жерлерде ғана іске асады.

Алдын ала белгіленген тарифтер:

• Шлагбаумы бар тұрақтарда сағатына 300 теңге;
• Ашық коммуналдық тұрақтарда сағатына 100 теңге.

Қазіргі мобильді қосымша жеке компанияға тиесілі. Енді осы компаниямен келісімшартты бұзу процесі жүріп жатыр. Кейін тұрақтар қала әкімдігіне өтеді.

Қызықты жаңалықтар мен видеоларды көру үшін TikTok арнамызға жазылыңыз!