Солтүстік Қазақстан облысында орақ науқаны өз мәресіне жетуге жақын.

Ауыл шаруашылығы басқармасы берген соңғы мәлімет бойынша, өңірде 5 млн 200 мың тонна бидай жиналған. Қазір диқандар егінді астық қабылдау орындарына тапсырып кептіріп жатыр.

Солтүстік Қазақстан облысында орақ науқанына ауа райының өзі қарайласып тұрғандай. Қазір айнала «алтын күзге» айналып, күннің көзі күлімдеп тұр. Табиғат ананың мұндай сыйын жер емген диқандар қалт жібермей, ырыс дәнін жанталасып жинап жатыр.

«Тіпті күннің қалай өтіп кеткенін байқамай қаламыз», — дейді ауыл еңбеккерлері.

Мұрат Қаражұманов, механизатор:

- Тез өтіп кетеді ғой. Таңның атысы, күннің батысы. Таң атқанын білмейміз. Күн батып қалады. Сол жұмыспен жүре береміз. Жасымыз келсе де, әлгі бала сияқты жүгіріп кетеміз трактор тізгінін ұстасақ. Биыл енді егіннің шығуы да жақсы болды.

Облыс бойынша орақ науқанына 7 мың комбайн жұмылдырылған. Биыл күзгі дала жұмыстарына Үкіметтен арзандатылған бағамен 82 мың тонна жанар – жағармай бөлінді. Оның бір бөлігі егінді кептіру үшін астық қабылдау орындарына үлестірілді. Қазір диқандар келесі жылдың қамына кірісіп кеткен.

Дәурен Тоққожынов, ауыл шаруашылығы басқармасының басшысы:

- Өңір диқандары келесі жылға 329 мың тонна тұқым қорын дайындап қойды. Бұл жалпы көлемнің 73 пайызы. Сонымен қатар облыс бойынша 1 млн 600 мың гектар жер өңделді. Биыл көктемгі дала жұмыстарын қаржыландыруға құжат қабылдау бір айға ерте басталды.

Өңірде 50-ге жуық элеватор жұмыс істейді. Биыл солтүстікқазақстандық диқандар 1 млн тонна астық экспортады. Өнім негізінен Ресей Федерациясы, Қытай және Орта Азия елдеріне сатылып жатыр.

Айдарбек Айтмұхамбетұлы, Төлеген Иманов