Өзбекстанда зейнет жасы ұлғаюы мүмкін. Ерлерді 60-тан 63-ке, әйелдерді 55-тен 58- жасқа дейін көтеру көзделіп отыр. Зейнетақы қорының мәліметінше ұлғайтудың екі нұсқасы қарастырылған. Жалпы Өзбекстанда 1993-ші жылдан бері зейнетақы жүйесіне өзгеріс жасалмаған. Жаңа реформа бюджетке түсетін салмақты азайтып, халықаралық қаржы ұйымдарының ұсыныстарын қанағаттандырмақ.

"Өзбекстанда зейнет жасын ұлғайту керек пе, жоқ па?" деген сұрақ былтырдан бері өзекті. Оның күн тәртібіне шығуына себеп көп. Мемлекеттік бюджетке түсетін салмақ жыл санап артып жатыр. Оған демографиялық өсіммен елдегі бала туу көрсеткішінің жоғарлауы қосылды. Осындай факторлар зейнет жасын ұлғайтуға әкелуі мүмкін.

Муродбек Атажанов, зейнетақы қорының атқарушы директоры:

- Өзге елдер зейнет жасын әлдеқашан ұлғайтып қойды. Бізде енді ғана қолға алынып жатыр. Өзбекстанда өмір сүру ұзақтығы артқан. Денсаулық сақтау министрлігінің мәліметінше, зейнеткерлердің орташа жасы 75-ке жетті. Егер бұрын зейнет демалысына шыққаннан кейін адамдар орта есеппен 8-9 жыл өмір сүрсе, қазір ерлер 12 жыл, әйелдер 20 жыл өмір сүреді.

Сарапшылар бұл мәселеде екі тараптың бірінің ғана мүддесі ескеріліп, бұра тарту болмауы керек-деп есептейді. Ең тиімді жолы зейнет жасын бірден емес, кезең- кезеңімен көтеруді жөн санайды. Қарапайым халықтың реформаға қатысты пікірлері екіұдай.

Дулат Нуркин, тілші

- Өзбекстанда қазір 4 млн-ға жуық зейнеткер бар. Бұл ел халқының шамамен 9 жарым пайызына тең. Ал ең төмеңгі зейнетақы көлемі 918 мың сум. Бұл біздің ақшамен 40 мың теңге шамасында. Қазынаға салмақ салмай, жүйедегі тұрақтылықты сақтау үшін зейнетақы саласына ерте ме, кеш пе, реформа жасалатыны анық. Сұрақ тек оның қашан жүзеге асырылатыны жайында болып тұр.