Қазақстанда жасанды интеллект алғаш рет медиа саласына кәсіби деңгейде енгізілді, деп хабарлайды 24KZ. Алматыдағы Әл-Фараби атындағы Қазақ ұлттық университетінде AI MediaLab атты заманауи зертхана ашылды.

Жоба нейрожелілерді қолдану арқылы отандық журналистиканың жаңа кезеңін бастауды көздейді. Зертхана соңғы үлгідегі техникамен жабдықталған. Ол университеттегі суперкомпьютердің мүмкіндігін пайдалану үшін ортақ дерекқорға қосылады. Қазір студенттер мен мамандар оны тәжірибе жүзінде меңгеріп жатыр. Сол еңбектің алғашқы нәтижесі – AI-TAMYZ басылымы. Бұл жасанды интеллект көмегімен әзірленген алғашқы инклюзивті форматтағы газет. Оның басты артықшылығы – ақпараттың баршаға қолжетімді болуы. Осылайша ақпарат теңсіздігін жоюға үлес қоспақ.

Нұр-Алтай Өмірзақ, Әл-Фараби ҚазҰУ Журналистика факультетінің магистранты:

- Яғни газетті қолына алып оқи алмайтын немесе көзі көрмейтін адамдар үшін оңтайлы мүмкіндік қарастырдық. Біз жасанды интеллекттің көмегімен арнайы QR-кодтар орналастыру арқылы осы газеттің бетіндегі барлық материалдың аудионұсқасы және бейнематериал нұсқаларын қосу үшін жағдай жасадық. Аудио және бейнематериал нұсқасы арнайы сілтеме арқылы YouTube платформасында шығады, қолжетімді болады.