Желіде Астанада тротуар опырылып, оған келе жатқан тұрғын құлап кеткені туралы ақпарат жарияланды, деп хабарлайды KAZ.NUR.KZ. Денсаулық сақтау басқармасы мен коммуналдық қызметтер жағдайға қатысты түсінік берді.

Telegram желісіндегі Аstanovka98 арнасында Астанада жергілікті тұрғын "жер астына түсіп кеткені" туралы ақпарат жарияланды.

"Қобыз сарайы аумағындағы жаяу жүргіншілер жолында келе жатқан тұрғынның астындағы жер опырылып, брусчатка ашылып қалған. Куәгерлердің айтуынша, шұңқырдың тереңдігі бір метрдей. Оның түбінде су жатыр. Құлап қалған қыз ауырсынып, жылады", — деп жазады автор.

NUR.KZ тілшісі Астана қаласының қоғамдық денсаулық сақтау басқармасына, сондай-ақ "Астана су арнасының" баспасөз қызметіне сауал жолдады.

"Жедел жәрдем қызметіне Керей көшесі, Жәнібек хандар көшесінде "Қобыз сарайы" аялдамасына жақын жерде болған оқиға туралы қоңырау түсті. Жедел жәрдем бригадасы науқасқа оқиға орнында алғашқы медициналық көмек көрсетті. Науқас ауруханаға жатудан бас тартты", — деп хабарлады дәрігерлер.

Ал "Астана су арнасы" компаниясы коллектор маңында тротуар тақталары түсіп кеткенін мәлім етті.

"Шұңқыр пайда болды, оның түбінде су жатты. Оқиға орнына "Астана су арнасы"- ның бригадасы жедел жетті. Техникалық байқау жұмыстары басталды. Жағдай толық бақылауда.

Оқиғаның себептері жүргізілген жұмыстың қорытындысы бойынша анықталады. Қолайсыздықтар үшін кешірім сұраймыз және түсіністік танытқан қала тұрғындарына алғыс айтамыз", — делінген хабарламада.