Бұдан былай Бурабайдағы қоғамдық шомылу орындары тегін болады, деп хабарлайды 24kz.

Осыған дейін жергілікті тұрғындар мен туристер суға түсу үшін ақша төлеп келген. Мәдениет және ақпарат министрлігінің бастамасымен облыстық қоғамдық кеңес мүшелері демалушыларды мазалаған бірқатар сұрақты көтеріп, туризм басқармасына тиісті ұсыныстар жолдады.

Абзал Азаматұлы, тілші:

- Қоғамдық кеңес мүшелері жыл сайын туристік орындарды аралап, экологиялық ахуалды тексеріп тұрады. Әсіресе, Бурабай мен Зеренді аудандары басты назарда. Себебі қос өлкеге жылына миллиондаған демалушы келеді. Демек, олар тарапынан түсетін ескертулер де аз болмайды. Қоғамдық кеңес өкілдері сол шағымдарды жан-жақты талдап, тиісті басқармаларға ұсыныстарын жолдады.

Қабдуәли Құлышов, облыстық қоғамдық кеңестің төрағасы:

- Көлдің басына бару үшін, суға түсу үшін үлкен азаматтан мың теңге, балалардан 500 теңге алатын. Соны біз айттық. Неге олай болады? Заң бойынша, Конституция бойынша жердің астындағы, жердің үстіндегі байлықтар бәрі халықтыкі. Қазір өзгерістер болып жатыр. Қазір бұл көлдің жағасына жай кіреді. Ақша төлемейді.

Қазір Бурабайда тегін шомылатын жалғыз орын бар. Жауаптылар алдағы жылы олардың санын көбейтуді көздейді.

Андрей Подгурский, облыстық туризм басқармасының басшысы:

- Келер жылдан бастап біз қоғамдық шомылу орындарын екі есе көбейтеміз. Яғни, Бурабай маңындағы барлық көлде бір жағажайдан ашамыз. Оның бәрі тегін болады.

Айта кетейік, жыл басынан бері Бурабайға 1 млн 200 мың демалушы келді.

Сайрахан Әбдіразақова, турист:

- Экологиялық ахуал енді барлық жері бірдей емес. Кейбір жерге көзқарасты дұрыстап қарату керек. Халыққа жағдай жасап, кішкене тоқтайтын мынадай жерлерінде бәрі бар. Жан-жағы қоқыс деп айта алмаймын. Адамдар өздері табиғатты сақтаса, тазалық болады.

Дана Құрманәлиева, турист:

- Өзім Онтүстік Қазақстаннан Мойынқұмнан келіп тұрмын. Ең бірінші, алғаш рет келуім. Өте керемет. Тазалық жағынан өте жақсы. Бағалайтын болсақ, 10-нан 10 баға берер едім.

Қоғамдық кеңес мүшелері осыған дейін Зеренді ауданындағы демалыс орындарының жұмысымен танысқан. Алдағы уақытта экологиялық бақылауға еріктілер мен табиғат жанашырларын да тарту жоспарланып отыр.

Авторлары: Абзал Азаматұлы, Виктор Полянный