Жанкүйерлер арасында “Акула” лақап атымен танымал даңқты қырғыз балуаны Ақжол Махмұдовтың әлем чемпионатына қатыспайтыны белгілі болды.

Бұл туралы Caravan.kz медиа порталы хабарлайды.

77 кг салмақ дәрежесінде екі мәрте әлем чемпионы атанған әйгілі қырғыз балуаны Ақжол Махмудов грек-рим күресінен өтетін 2025 жылғы әлем чемпионатына қатыспайтын болды. Аталмыш турнир 13–21 қыркүйек аралығында Хорватияның Загреб қаласында өтеді.

Қырғызстанның күрес федерациясының мәліметінше, спортшы жарысқа толық дайын емес. Сол себепті ол бар күшін қараша айында өтетін Ислам ынтымақтастығы ойындарына салуды жөн көрген.

Махмудов Жапонияда өткен Қырғызстан құрамасының оқу-жаттығу жиындарына қатысқанымен, визалық мәселелерге байланысты Польшада өткен халықаралық турнирде өнер көрсете алмады.

Айта кетейік, Ақжол Махмудов 2024 жылы Париж Олимпиадасында қола жүлде жеңіп алып, Германия чемпионатында топ жарған болатын.