Жамбыл облысында 5 жыл бойы балаларға қол көтеріп, қорлық көрсетті деген күдікпен өгей әке қамауға алынды.
Бұдан бұрын әлеуметтік желіде үсті басы соққыдан жараға айналып, мал баққан екі жеткіншектің видеосы тараған. Осы мәселеге байланысты арнайы комиссия құрылып, жедел тергеу басталды. Қазір балалардың жағдайы қалай?
Әлеуметтік желіде тараған мына видео Талас ауданындағы Көктал ауылы маңында түсірілген. Мал баққан балалар өгей әкесінің ауыр жұмысқа салып, жиі қол көтеретінін айтып шағымданған. Дәлелі ретінде денесіндегі көгерген, жара болған тұстарын көрсетеді. Балалардың мұндай хәлін ауыл тұрғыны байқап, туыстарына хабар берген.
Жанерке Нұрмұхаммед, жәбірленушілердің әпкесі:
- Үйде отырғанмын. Бөтен билайн нөмір хабарласты. Соны алды да үлкен ұл жылап жіберді. Дәу мама бүгін мені алып кетпесең бізді, мен қашамын немесе өлемін осы жерде, — деді. Менің талабым бар ғой, бөліп тастау, аналық парызынан айыру емес. Маған тек қана өгей әке жазасын алса, бұлар шешелерімен бірге болса деймін.
Даулы видеоға байланысты аймақта арнайы комиссия құрылды. Олар зардап шеккен екі емес ағайынды үш бала екенін анықтаған. 16 жастағы егіздер мен 10 жастағы оқушы, әйелдің бірінші некеден туылған балалары екен. Қазір кәмелетке толмаған балалар әлеуметтік көмек көрсету орталығында психологиялық көмек алып жатыр.
Айдана Биғабылова, Тұрмыстық зорлық-зомбылық құрбандарына әлеуметтік көмек көрсету орталығының директоры:
- Полиция департаменті медициналық сот сараптамасын тағайындап, оны қазір өткізді. Балалардың құлақ тұсында ісінуі, Нұрсұлтанның айтуынша бел тұсының ауыратындығын, басының ауыратындығын айтты. Дене жарақаты, ауыру сезімі осы ұзақ уақыт бойы соққының салдарынан деп айтып отыр өздері.
Қарлығаш Салықбаева, облыстық Кәмелетке толмағандардың істері жөніндегі комиссия хатшысы:
- Келеңсіз жағдайға байланысты облыс әкімінің тапсырмасымен жұмыс тобы құрылды. Жұмыс тобы бүгінгі күні осы мәселені жан-жақты зерделеуде. Сонымен қатар ішкі-істер органдары тарапынан тергеп-тексеру жұмыстары жүргізіліп жатыр.
Қазір балалардың жанында өз әкесі мен туыстары бар. Оқиғаға байланысты қылмыстық іс басталып күдікті ретінде өгей әкелері қамауға алынды. Ал бұл іс біткенше жәбір көрген жеткіншектер бейімдеу орталығында болмақ.
