Жол инфрақұрылымының жақсаруы Қарқаралыдағы туризмнің дамуына оң серпін берді.
«Қарағанды-Аягөз-Тарбағатай-Бұғаз» республикалық маңызға ие жолдың таулы аймаққа дейінгі 200 шақырымы қазір тақтайдай. Жол жақсарғалы туристер көп келе бастаған. Дегенмен демалыс орындары жеткіліксіз. Өлкенің туристік әлеуеті мен түйткілді мәселелерін облыстық қоғамдық кеңес мүшелері көтерді.
Былтыр Қарқаралыға 32 мың турист келген. Ал биыл алты айдың өзінде 20 мыңнан адам демалып қайтты. Туристердің көбеюіне жол инфрақұрылымының жақсаруы септігін тигізген. 200 шақырым жолдың бойында демалыс орындары, дәмханалар, жанармай мен санитарлық бекеттер ашылды.
Серікжан Байбосынов, облыстық қоғамдық кеңес төрағасы:
- Бір қуантарлық жағдай инфрақұрылым, әсіресе жол мәселесі шешіліп тұр. Туристік аймақ ретінде дамытуға өте жоғары деңгейде әлеуеті бар деп отырмыз. Сондықтан енді қоғамдық кеңестің, жергілікті атқарушы органның бірлесуімен жұмысымызды бастаймыз. Анықталған кемшіліктер, қолдаулар осы қоғамдық кеңестің ұсынысына енетін болады.
Мұнда 40-қа жуық демалыс орыны бар. Олар бір мезетте 2500 адамға қызмет көрсете алады. Бірақ бұл жеткіліксіз, дейді жергілікті билік өкілдері. Осыған орай келешекте Бұғылы тауы баурайында жаңа демалыс орындары салынады. Қоғамдық кеңес мүшелері осы аумақта басталып кеткен инженерлік-инфрақұрылымдық жұмыспен танысты.
Нұрлыбек Ілдебаев, Қарқаралы ауданы кәсіпкерлік және өнеркәсіп бөлімінің басшысы:
- Биыл жұмыс басталды. Кәріз, су және электр жүйесін тартуда. Құны 4,5 миллиард теңгеге жуық жоба. Биылғы жылы суы, барлығы тартылып болғаннан кейін келесі жылы 18 жер учаскесіне бөлініп, аукционмен берілетін болады.
Таулы, орманды өлкенің 112 120 гектар жері Қарқаралы мемлекеттік ұлттық табиғи паркіне тиесілі. Ұзақ және қысқа мерзімге жалға берілген әр жер учаскесі жіті бақылауда. Ұлттық парк жерінің 19 пайызы туристік нысандарға берілген. Қоғам белсенділері демалыс орындарында экологиялық талаптардың орындалуын және өрт қауіпсіздігін бақылауда ұстауды тапсырды.
Руслан Нұрланұлы, Сайлау Игіліков, Аман Хамит
