Шымкентте мамандар мониторинг жүргізіп , 46 заңсыз қоқыс үйіндісін анықтады.

Былтырғымен салыстырғанда екі есе көбейіп кеткен. Кез келген жерге төгілген күл-қоқыс, сол маңдағы топырақ пен суды ластаған. Бұған дейін тазартылған жерлердің өзіне, биыл қайтадан қоқыс үйіліп қалған. Экологтарды қоршаған ортаның жағдайы алаңдатып отыр.

Қала аумағында заңсыз қоқыс үйіндісі көбейіп кетті. Әсіресе жеке тұрғын үй секторларының төңірегі мен сай-сала тұрмыстық қалдыққа толып, қоршаған ортаға зиян келіп жатыр. Тіпті геопорталдың ғарыштық түсірілімінен үйілген қалдықтың аумағы көрініп, полигонға айналудың аз-ақ алдында тұр.

Нұрсұлтан Мұхамеджан, тілші:

- Қала іргесіндегі бұл аумаққа тұрмыстық және өндірістік қалдық көптеп төгілген. Маңайда құрылыстан шығарылған заттардың да шашылғанын көруге болады. Мамандардың айтуынша, бұл қоршаған ортаға зиянын тигізіп қана қоймай, адам өміріне де тікелей қауіп төндіреді.

Өңірде «Заң мен тәртіп» үстемдігін орнату үшін бақылау күшейтілді. Полицейлер санитарлық талапты бұзғандарға шара қолданып жатыр. Үш тәулікте 2500 адамға әкімшілік хаттама толтырылды.

Ердәуіт Ниязов, қалалық ПД жергілікті полиция қызметі басқармасы бастығының орынбасары:

- Абаттандыру қағидаларын бұзғаны үшін 1200 хаттама толтырылды. Ортақ пайдалану орындарын ластағаны үшін 210 хаттама толтырдық. Белгіленбеген орындарда сауда жасап жатқандар бойынша 400 әкімшілік құқық бұзушылық анықталды. Бұл іс шара бізде әрдайым бақылауда.

Көп адам қоқысты түн қараңғысында төгіп, жауапкершіліктен сытылып кетеді, дейді мамандар. Алайда бұл іске жауапты лауазымды тұлғалар жазасыз қалмайды. Тиісті бақылау жүргізіп, тазалық жұмыстарын ұйымдастыра алмағандар жауап береді. Талдау нәтижесінен соң Әл-Фараби, Абай, Қаратау және Еңбекші ауданы әкімдерінің орынбасарына айыппұл салынды.

Сабыр Балыбек, қалалық экология департаменті басшысының орынбасары:

- Былтыр бізде 25 нүкте анықталған осы ғарыштық сапар түсірілімдері нәтижесінде. Биыл 46. Салыстырмалы түрде екі есе болып тұр қазір. Негізі заң бұзушылықтардың көбісі камералар жоқ жерде, жолдан тыс аумақта, өзен жағалауларына ретсіз тасталады.

Осыған байланысты бұл аумақтарға ескерту тақтайшалары мен бейнебақылау камерасын орнату ұсынылды. Сондай-ақ экологиялық мәдениетті қалыптастыру үшін үгіт-насихат жүргізіп, рейдтік іс-шараны күшейту қолға алынды.

Нұрсұлтан Мұхамеджан, Самат Нағашбекұлы