Елде бала туу көрсеткіші төмендеп барады. «Бұл үрдіс ұзақ жылдарға созылуы мүмкін», – дейді сарапшылар. Мәселен, туу деңгейі жоғары саналатын Түркістан облысының өзінде соңғы жылдары теріс динамика байқалады. 2021 жылы өңірде 65 мың бала туса, былтыр 53 мың бала дүниеге келген.

«Күрделі жағдайға жастардың отау құруға асықпауы, ажырасудың көбеюі және азаматтар арасында иммунтапшылық вирусының азаймауы себеп болып отыр», – дейді сала мамандары. Бүгін елордада репродуктивті денсаулық тақырыбында дөңгелек үстел өтіп, апталық жұмысы қорытындыланды.

Тоғжан Қожалы, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия мүшесі:

- Бұрын ВИЧ мәселесі сол ЛГБТ немесе наркомандар арасында болады деп есептеп жүрдік. Қазір статистика бойынша өз елімізде, әсіресе батыста өсіп жатыр. Былтыр 34 адам болса, қазір жыл басынан 60-тан астам адамға ВИЧ диагнозы қойылыпты. Баланы бірінші рет туғандардың 30%-і жыныстық инфекциялық аурулары бар әйелдер екен.