Түркістан облысының Сайрам ауданында жайлым тапшылығынан жұрт жыл он екі ай төрт түлігін қораға қамап ұстауға мәжбүр. Шапырашты ауылының тұрғындары мал жаятын жердің барлығы жекенің меншігіне өтіп кеткенін айтады. Ал аудандық әкімдік Шапырашты мен Береке ауылында жайылым жер жоқ екенін ашып айтты. Бүгінде жайылым тапшылығы облыс аумағында өзекті проблема болып тұр. Облыстық Жер қатынастары басқармасы мамандарының мәліметінше, өңірде әлі де 540 мың гектар жайылым жетпейді. Былтыр жекешеленіп кеткен 68 мың гектар жер мемлекет меншігіне қайтарылған. Биыл 110 мың гектар жерді ортақ жайылымға беру жоспарда бар. Осы проблеманы шешу үшін арнайы жұмысшы топ құрылды. Топ мүшелері 3960 жер пайдаланушының жайылым жерлеріне мал басының тіркелмегендігін анықтаған.

Марат Әбуов, Түркістан облыстық жер қатынастары басқармасының бөлім басшысы:

Өз еркімен жерді қайтармаған азаматтарға қатысты, тіркелмеген мал басы мен игерілмеген жер телімдерін сот тәртібімен мемлекет меншігіне қайтару жұмыстары Жер ресурстарын басқару департаменті тарапынан жүргізілуде. Биылғы жылы 38 жер пайдаланушыдан жалпы көлемі 8300 гектар жер қайтарылды.

Айнұр Әбілқасымқызы