Өзбекстан тұрғын үйді қолма-қол ақшаға сатып алуға тыйым салмақ. Енді үлескерлер қаржысын құрылыс компаниясына емес, банктен ашылған арнайы шотқа салады. Қарапайым халық мұндай жаңашылдық баспана бағасының күрт қымбаттауына соқтырады деп алаңдаулы. Ал шенеуніктер ешқандай қымбатшылық болмайды, керісінше тұрғындардың мүддесін қорғау үшін жасалып отыр дейді.

Бұл құрылыс компаниясына миллиондап қаржы салып, кейіннен алаяқтарға алдандық деп шу көтерген үлескерлер. Көрші елде мұндай көріністерді жиі кездестіруге болады. Алдағы уақытта келеңсіздік болмауы үшін билік жаңа бастаманы қолға алып, эскроу-шот жүйесін іске қоспақ.

Мубин Мирзаев, Салық комитеті төрағасының орынбасары:

Бұл транзакцияларды заңдастырып, көлеңкелі экономикамен күресуге бағытталған. Заң жобасы тиісті министрліктермен келісіліп, бүгінде президент әкімшілігінің қарауына жіберілді.

Әлеуметтік желіде эскроу жүйесі енгізілген соң жылжымайтын мүлік бағасы 30 пайызға қымбаттайды деген ақпарат тараған. Алайда құрылыс және тұрғын үй-коммуналдық шаруашылығы министрлігі мұны жоққа шығарды.

Саидносир Усмонов, Құрылыс және ТКШ министрлігі баспасөз қызметінің басшысы:

Үлестік тұрғын үй құрылысы саласында эскроу-шот жүйесіне кезең-кезеңімен көшу жоспарланған. Бұл жоба негізі 1 шілдеден ішінара жүргізіле бастады. Келесі жылдан бастап есеп айырысу тек банк арқылы жүзеге асады.

Ал сату мен сатып алу міндетті түрде арнайы электронды платформаға тіркеледі. Үлескерлер қаржысын банктен ашылған шотқа салады. Құрылыс аяқталып, ғимарат пайдалануға берілген соң ғана баспана алушының ақшасы компанияға аударылады.

Асқар Якубов, Ташкент қаласының тұрғыны:

Әрине бұл сенімді жылжымайтын мүлік нарығын қалыптастырады. Ғимарат құрылысының мерзімінде аяқталмай, созылып кетуінің алдын алады. Дегенмен мәселені асықпай талқылап, әлі де жан-жақты қарастыру керек еді деп ойлаймын.

Енді баспана құрылысына ашық бақылау жүргізіледі. Тұрғындардың қаражаты қорғалып, алаяқтық схемалар жойылады деген сенім бар. Бүгінде электронды тұрғын үй құрылысы платформасы жасақталып жатыр. Сатып алушылар құрылыс компаниясының рейтингін, нысандарды жоспарлы мерзімде бітіре ала ма, жоқ па деген секілді ақпаратты түгел тексере алады.

Базаркүл Отыншиева