Желіде Түркістан облысы Отырар ауданында оқушы қызды 4 ер адам зорлап, жүкті болып қалды деген ақпарат тарады . Бұл туралы Skifnews.kz ақпарат порталы Stan.kz-ке сілтеме жасап хабарлайды.

Аталған жағдайды Threads әлеуметтік желідегі парақшасында заңгер Ләззат Рақышева мәлімдеді. Оның сөзінше, жәбірленуші қыз 9-сыныпты енді тәмамдаған.

"Отырар ауданында өте жағымсыз оқиға болып жатыр. 9-сынып бітірген қыз жүкті болып қалған. 4 адам күдікті. Олар 11-сынып оқушысы мен 3 ер адам. Олардың арасында үлкен азаматтар да бар. Өңірде бұл жағдай өсек ретінде тарап, ауыл азаматтары қызды кінәлап жатыр екен. Ішінде бір дөкейдің баласы бар дейді. Енді олар кінәлілер жазадан құтылып кете ме деп уайымдап отыр", – делінген жазбада.

Аталған жағдайға қатысты Stan.kz тілшісі Түркістан облысының полиция департаментінен мән-жайды сұрап білді. Олардың мәліметінше, оқушы қызға кәмелет жасына толмаған танысы тиіскен.

"Отырар ауданы тұрғынының мектеп жасындағы туысына кәмелетке толмаған танысы жасаған іс-әрекет туралы арыз полицияда қаралып, тергеу жүргізіліп жатыр. Тергеу аясында сараптамалар тағайындалды. Нәтижесі бойынша қолданыстағы заңнама шеңберінде процестік шешім қабылданады", – делінген хабарламада.

Полиция департаменті кәмелетке толмаған қыздың жүктілік фактісі шындыққа сәйкес келмейтінін айтты.

"Бірнеше адамның құқыққа қайшы әрекеті туралы және кәмелетке толмағанның жүктілік фактісі шындыққа сәйкес келмейді. Тергеу мүддесіне сәйкес өзге де ақпарат жария етуге жатпайды. Тергеу барысы облыстық полиция департаменті басшылығының бақылауында. Өз кезегінде полиция жалған ақпарат таратқаны үшін заңға сәйкес жауапқа тарту көзделгенін еске саламыз. Сондай-ақ азаматтарды тек ресми дереккөздерге сенуге шақырамыз", – делінген хабарламада.