Сала өкілдерінің айтуынша, алдағы жылдары Алакөл туристік хабы ретінде одан әрі дами түсіп, халықаралық деңгейге шығуы әбден мүмкін.

Алакөл өңіріндегі туризм саласы жыл санап серпін алып, аудан экономикасының негізгі тіректерінің біріне айналып отыр. Соңғы үш жылда Алакөлге келген туристердің жалпы саны 4 миллион 773 мың адамға жетіп, көрсетілген қызмет көлемі 29 миллиард 423 миллион теңгені құрады. Осы орайда Алакөл ауданының әкімі Алмас Әбдинов туристердің жайлы демалуына жағдай жасау мақсатында қолға алынған жобалар мен олардың әрқайсысына бөлінген қаржы көлемі жөнінде кеңінен мәлімет берді.

Алакөл ауданында демалыс орындарының саны да жыл сайын артып келеді.

"2022 жылы өңірде 270 демалыс орны жұмыс істеп, 1 млн 498 мың адам демалса, көрсетілген қызмет көлемі 9 млрд 428 млн теңгені құраған. 2023 жылы демалыс базаларының саны 292-ге жетіп, туристер саны 1 млн 550 мың адамға, ал қызмет көлемі 9 млрд 920 млн теңгеге артты. Ал 2024 жылдың өзінде-ақ демалыс орындарының саны 302-ге дейін өсіп, 1 млн 725 мың адам Алакөл жағалауында тыныққан. Қызмет көлемі 10 млрд 75 млн теңгені құрап отыр. Мұндай көрсеткіштер Алакөл аймағындағы инфрақұрылымның жыл санап жақсарып келе жатқанын көрсетеді. Жаңа демалыс базалары, жолдардың жөнделуі, кәріз және су жүйесінің жаңартылуы – туризмнің тұрақты дамуына оң ықпал етіп отыр", – деді Алмас Әбдинов.

Оқи отырыңыз: Алакөл туризмінің дамуы коммуналдық мәселелерді күшейтті. Экологиялық қауіпсіздік мәселесі қашан шешіледі

Сала өкілдерінің айтуынша, алдағы жылдары Алакөл туристік хабы ретінде одан әрі дами түсіп, халықаралық деңгейге шығуы әбден мүмкін.

Жетісу облысында көптен күткен Алакөл көлінің жағалауында қорғаныш дамбасын салу және серуен аймағын қалыптастыру жобасы ресми түрде басталды. Әкімнің айтуынша, жобаның жалпы құны 19 миллиард теңгені құрайды.

"Конкурс процедуралары аяқталып, мердігер ұйым анықталды. 1 шілдеден бастап Көктұма ауылында маңызды жұмыстар басталады. Себебі Ақши ауылында дәл қазір шомылу маусымының қызған шағы. Ал Ақши бағытындағы жұмыстар 10 тамыздан басталады деп жоспарланып отыр. Бұл – жобаның бірінші кезеңі, ал екінші кезеңі – жағалау аумағын абаттандыру", – деп сендірді әкім.

Оқи отырыңыз: Алакөл. Қай жағалауында демалған дұрыс?

Жобаның бірінші кезеңін іске асыру үшін республикалық бюджеттен 19 миллиард теңге қарастырылып, оның 1,5 миллиарды қазірдің өзінде бөлінген. Құрылыс жұмыстарын екі жыл ішінде аяқтау көзделіп отыр. Дамбаның жалпы ұзындығы – 13 шақырымнан асады.

Жағалауды бекіту құрылысы Ақши мен Көктұма ауылдарының жағалау сызығы бойымен жүргізіледі. Бұл дамбаның басты мақсаты – қатты толқындар мен мұз қату салдарынан жағалау аймағының бұзылуынан қорғау.

Алакөл жағалауындағы қорғау жұмыстары Жетісу мен Шығыс Қазақстан облыстарының билігінің күн тәртібінде бірнеше жылдан бері көтеріліп келеді. Екі жыл бұрын туристік бизнес өкілдері бұл жобаның маңыздылығын ашық айтып, соңғы 15 жылдан астам уақыт бойы жағалаудың бұзылуы өзекті мәселе болып келе жатқанын жеткізген болатын. Осы аралықта ондаған демалыс орны судың астында қалып, кәсіпкерлікке айтарлықтай залал келтірілді.