Қазақстанда алғаш рет нейрохирургтар конгресі өтті.

Форумға әлемнің 20 елінен 400-ден астам медицина саласының майталманы келді. Шара барысында әлемдік нейрохирургтер өз тәжірибесімен бөлісіп жатыр. Инновациялық тәсілдер мен жоғары технологияларды қолдану, күрделі тамырлы және онкологиялық патологияларды емдеу, сондай-ақ функционалдық және балалар нейрохирургиясындағы жаңа бағыттар бойынша өзекті мәселелер талқылануда. Конгрестің негізгі мақсаты отандық нейрохирургияның жоғары деңгейін таныта отырып, ғылыми және клиникалық ынтымақтастық орнату.

Талғат Керімбаев, Ұлттық нейрохирургия орталығының жұлын нейрохирургиясы бөлімшесінің меңгерушісі:

- Жаңа мәселелер көтеріледі. Нейрохирургияның қандай жаңа технологиялары, қандай жаңа жабдықтары еңгізіліп жатыр. Жаңа әдістер көрсетіледі. Болашақта біздің нейрохирургтар бүгінгі конференцияның нәтижелерін жұмысына енгізеді деп ойлаймын.

Aқмарал Әлназарова, ҚР Денсаулық сақтау министрі:

- Бүгінде еліміздің барлық өңірлері нейрохирургиялық көмекпен қамтылған. Соңғы жылдары 80-нен астам жаңа медициналық технологиялар енгізілді. Ұлттық нейрохирургия орталығына соңғы жылдары шет елдерден келетін пациенттер көбейді.