Елде жыл басынан бері 12 мыңнан астам жол-көлік оқиғасы тіркелген.

Салдарынан 18 мыңға жуық адам зардап шексе, 740 адам қайтыс болған. Бұл тек алғашқы жартыжылдықтың статистикасы. Десе де полицейлер жол апаттарының алдын алу үшін түрлі шаралардың қабылданып жатқанын айтады. Алайда ережені елемейтін жүргізушілер мен жаяу жүргіншілердің салғырттығы қайғылы жайттардың басты себебі болып отыр.

Мерей Қанапия, тілші:

- Қазір сағат таңғы 6. Жол сақшылары күнделікті қызметтеріне аттануға дайындалып жатыр. Олар алдымен нұсқаулық алып, өз бағыттары бойынша қала көшелеріне патрульге шығады.

Мереке қарсаңында полицейлердің қызметте жүруі қалыпты жағдай. Олар тәулік бойы қала көшелеріндегі тәртіп пен жолдағы қауіпсіздікті қамтамасыз етеді. Мысалы, Айбек Нартбаев патрульдікке қызметке 15 жылын арнаған. Осы уақыт аралығында ол қарапайым жол сақшысынан бастап, полк командирінің орынбасарына дейін көтерілді.

Айбек Нартпаев, Астана қаласы ПД ЖПП полк командирінің орынбасары:

- Жол полициясы қызметкері болу ол үлкен жауапкершілік. Мамандықты жайдан жай таңдаған жоқпын. Балда кезімнен тәртіп пен әділдікті жоғары бағалап өстім. Енді соны күнделікті қызметімде басшылыққа аламын. Адамдармен жұмыс істеу, қиын сәтте көмек беру мен үшін абырой әрі жауапкершілік. Өз мамандығымды шексіз жақсы көремін. Осы сәтті пайдаланып, әріптестерімді кәсіби мерекесімен шын жүректен құттықтаймын.

Астананың өзінде жыл басынан бері жол қозғалысын бақылау барысында 800 мыңнан астам әкімшілік құқық бұзушылық тіркелген. Соның ішінде “Қорғау” жүйесі арқылы жалған 27 номер таққан азаматтар анықталса, жүргізуші куәлігі жоқ 468 адам ұсталды. Одан бөлек 85 азамат жүргізуші куәлігінен айырылып, 700-ге жуық автокөлік коммуналдық тұраққа қойылған.

Әкімшілік құқық бұзушылық – 800 мың

Жалған номер таққандар – 27

Жүргізуші куәлігі жоқтар – 468

Жүргізуші куәлігінен айырылғандар – 85

Айып тұрағына қойылған көліктер – 697

Нұрсұлтан Сәриев, Астана қаласы ПД Жол-патрульдік полициясының инспекторы:

- Неше түрлі адам болады ғой. Ішіп алған адам... Түсінбейді. Бармаймын деп қарсылық көрсетеді. Адаммен ерегіседі. Шабуыл жасаған кезде әрине сабырлық танытып, заң атымен талап етіп, алып бару керек болады. Өзіме осы жұмыс ұнайды. Жас кезімнен полиция боламын деп кіргім келіп, армандап келгенім бар.

Полиция қызметі темірдей тәртіпке бағынып, халықтың амандығы үшін тынымсыз еңбек ететін жандардың жолы. Қызығы мен қиындығы қатар жүретін бұл салада ең бастысы төзім мен табандылық және кәсібіңе деген адалдық қажет дейді тәртіп сақшылары. Себебі бұл қызмет ел тыныштығының тірегі әрі халық сенімінің айнасы екені даусыз.

Мерей Қанапия, Қанат Махмутов