Израиль шабуылдарды тоқтатпаса, Иран Америка Құрама Штаттарымен келіссөздерді бастамайды . Мұны Ислам Республикасының сыртқы істер министрі Аббас Аракчи бүгін Стамбұлда Ислам Ынтымақтастығы Ұйымы бас дипломаттарының жиыны аясында мәлімдеді.

Оның сөзінше, ирандықтар Американың қолдауымен бомбаланып жатқанда Вашингтонмен келіссөз жүргізу мүмкін емес. Бұған дейін Аракчи Женевада еуропалық министрлермен кездесті. Сол жиында Ұлыбритания, Франция, Германия Иранды ядролық бағдарлама туралы диалогты қайта жандандыруға шақырған.

Сенбіге қараған түні, Иран Израильге зымырандармен, дрондармен соққы берді. Одан Тель-Авивте жарылыстар болып, елдің орталығында бір ғимарат өртеніп, Хайфада егде жастағы әйел қаза тапты. Осылайша, еврей мемлекетінде Иранның соққыларынан бір аптада мерт болғандар саны 25-ке жетіп отыр.

Ал Израиль Иранның Исфахан, Тегеран, Фордодағы ядролық және зымыран ұшыратын объектілеріне шабуыл жасады. Бұл соққылардан бірнеше адам опат болған. Бейресми мәліметтерге қарағанда, маусымның 13-де Израильмен әуе шайқасы басталғалы, Иранда соғыс құрбандарының саны 657-ге жеткен.

Арыстан Рысбек