Алматыда 13 адамның өмірін қиған хостелдегі өртке қатысты сот отырысы жалғасып жатыр. Бүгін ғимаратты жалға алған Әділбек Мұхамедяровтан жауап алынды. Сот отырысынан әріптесім Айдана Қуантхан тікелей қосылуға дайын.

- Айдана, отырыста қандай ақпараттар айтылды?

Айдана Қуантхан, тілші:

Қайырлы кеш, Шерхан. Түскі сағат 3.00-те басталған сот отырысы әлі де жалғасып жатыр. Қазір Әділбек Мұхамедяровтан жауап алынып жатыр. Әділбек Мұхамедяров әу баста нысанды алып-сату платформасында жарнамаланғанын, онда нысан хостел ретінде берілетіні көрсетілгенін айтты. Ал ғимаратты жалға беруші «Қуса халық» компаниясы аумағы 460 шаршы метр болатын бірінші қабат пен жертөле хостел ретінде жалдауға жарамды екенін жеткізеді. Айтуынша, бірінші қабатта 2 үлкен холл, 4-5 бөлме, ал жертөле жатақхана ретінде 7 бөлмеге бөлінген. Сондай-ақ келісімшартта ғимаратты хостел мақсатында пайдалануға болатыны да көрсетілген дейді айыпталушы Әділбек Мұхамедяров. «Қуса халық» компаниясы өрт қауіпсіздігі құрылғылары талапқа сай екенін, кепілдік бар екенін айтқан. Ал ғимаратты жалға алған уақыт ішінде төтенше жағдай Департаменті тарапынан ешқандай тексеру болмағанын айта кетті.

Еске сала кетейік, «Алматы хостеліндегі» өрт 2023 жылдың 30 қарашасында болды. 13 адам қаза тапты. Қылмыстық істе 2 адам айыпталып отыр. Олар – ғимаратты жалға алған Әділбек Мұхамедияров пен өрттен қорғау жүйесін орнату жөніндегі маман Александр Пекельник. Келесі сот отырысы ертең 20 маусым күні өтеді. Мендегі ақпарат осы, Шерхан.

Айдана Қуантхан