Әлем елдерінде мұғалімдерге жалақы төлеу жүйесі әртүрлі. Бұл әр мемлекеттің жергілікті заңы мен оқытушылардың еңбек өтіліне байланысты өзгеріп отырады , деп хабарлайды 24kz.

Биыл сала мамандарына ең жоғары айлық төлейтін елдердің тізімін Люксембург бастап тұр. Мұндағы мұғалімдер жылына шамамен 137 мың доллар жалақы алады. Тағы қай елдерде оқытушыларға жақсы жағдай жасалған?

Әлемде мұғалімдерге ең жоғары жалақы төлейтін ел – Люксембург. Экономикалық ынтымақтастық және даму ұйымының кейінгі зерттеуінде келтіріліген дерек осындай. Мұнда сала мамандарына жақсы жағдай жасалған. Мысалы, бакалавр дәрежесін алған жас маманға жылына 70 мың АҚШ доллар көлемінде жалақы төленеді. Табыс көлемі оқытушының еңбек өтіліне байланысты өсе береді. Салада 15 жыл еңбек еткен маманға 100 мың доллар жалақы төленеді. Ал 30 жылдан астам тәжірибесі бар мұғалімге төленетін сома да қомақты. Бұл – шамамен 137 мың доллар.

Магистр дәрежесі бар мұғалімнің табысы жоғары

Шәкірт тәрбиелеп отырған швейцариялық мамандардың да айлық табысы аз емес. Бұл елдің мұғалімдерге жалақы төлеу жүйесі Люксембургке ұқсас. Бірақ магистр дәрежесін бітірген маман бакалаврмен ғана шектелген оқытушыға қарағанда көбірек алады. Ал мансап жолын енді бастаған орта мектеп мұғалімінің айлық табысы 73 мың доллар шамасында. Оның мөлшері еңбек өтіліне қосылған әр он жыл сайын 10 мың долларға ұлғая береді.

БАӘ-де мұғалім табысынан салық төлемейді

Біріккен Араб Әмірліктерінде мұғалімдердің жалақысынан табыс салығы алынбайды. Оларға қосымша төлемсіз орташа есеппен 2500 мен 5500 доллар арасында айлық төленеді. Сонымен қатар білім беру ұйымдары оқытушылардың ай сайынғы тұрғын үй жәрдемақысын төлейді. Тіпті, тегін пәтер де береді. Сондай-ақ медициналық сақтандыру, бір жылдық ақысыз әуе қызметімен қамтамасыз етеді. Бұдан бөлек, мұғалімдердің біліктілігін арттыруы үшін халықаралық тәжірибе, шеберлік сағаттарына қатысу мүмкіндігі қарастырылған.

Германияда айлық еңбек өтіліне қарай төленеді

Германияда да білім саласы қызметкерлеріне жоғары жалақы төленеді. Әсіресе, халықаралық мектептерде білім беретін мамандардың айлық табысы орта мектеп мұғаліміне қарағанда әлдеқайда көп. Оған қоса еңбек өтілі мен квалификациялық білім деңгейі жоғарылаған сайын төленетін айлық мөлшері де ұлғая береді. Экономикалық ынтымақтастық және даму ұйымы келтірген мәліметке қарағанда, салаға енді қадам басқан жас маманның табысы 1500 долларға жуық. Ал еңбек өтілі 20 жылдан асса, 3 есе артық төленеді.

Авторы: Әсия Нұрлыбаева