Ресейде санкция салдарынан дәрі жетпей жатыр. Ресми дерекке сәйкес, ауруханалардың 80 пайызында дәрі дефицит. Мамандар әсіресе қант диабеті, қатерлі ісікке қарсы препараттардың жоқтығын айтып, дабыл қағуда. Ресейде оннан астам ірі фармацевтикалық компания жабылып қалған. Ал шетелден импортталатын дәрі де қазір елге жеткізілмей жатыр. Бар дәрінің бағасы 400 пайызға дейін қымбаттаған.

Ольга Бараева, Мәскеу тұрғыны:

Барлық дәрілердің бағасы көкке ұшты. Тіпті тұмауға қарсы препарат таппайсың. Бұрын шетелден әкелінетін дәрілердің орнына Ресейде шығарылатын аналогын береді. Алайда ол көмектеспейді. Сондықтан қосымша ақша төлеп, өзіміз шетелден алдырамыз. Менің айлығымның жартысы осы дәріге кетеді.

Дәрі дефициті әсіресе Мәскеу, Санкт-Петербург сияқты ірі қалаларда көп. Енді барлық дәріхана Денсаулық сақтау министрлігінің қадағалауына өтпек. Санкция басталғалы Ресей нарығында 2000-нан астам шетелдік препарат жоғалып кеткен. «Отандық фармацевтика сұранынысты толық қанағаттандыру үшін ең азы он жыл керек» деді сарапшылар.

Индира Бегайдар