Су кодексі қолданысқа енді. Алғаш рет «су қауіпсіздігі» ұғымы енгізілді. Кодекс су үнемдеудің жаңа тетіктерін кіргізу, су тапшылығына жеткізбеу, су нысандарын ластанудан қорғау қызметін ширатып, трансшекаралық су нысандарын пайдалануда мемлекет мүддесін жібермеуге арналған. Саланы басқару тәсілдерін қайта қарастырады.

Сонымен бірге су тасқынының, одан келетін зиян мен залалдың алдын алу және жою жөніндегі іс-шараларды қамтиды. Су қорын мемлекеттік бақылауды қатаңдатуға, гидротехникалық құрылыстардың қауіпсіздігін қамтамасыз етуге бағытталған.

Былтырғы су тасқыны әбден шиленген мәселелердің түйінін тарқатпасақ, ауыздықтау мүмкін емес ситуацияға түсетінімізді көрсетті. Келген қорытындының бірі – кезінде жабылып қалған Тараз гидро-мелиоративті институтының базасында арнайы жоғары оқу орнын қайта ашу еді. Сөйтіп Қазақ ұлттық су шаруашылығы және ирригация университеті ашылған. Оқытушылары мен басшылық арасында дау болып жатыр. Жоғары білім министрі «бәрі шешіледі» деп қояды.

Кезінде жасалған қате шешімнің тағы біреуі – Астанадағы кіші Талдыкөлді құрғатып, үйлер салынғаны. Негізі жерасты суы адам бұйрығына бағынбайтынын мектеп оқушысы біледі.

Кезінде «Жағымсыз иістен құтыл, әйтпесе сол жерде палатка тігіп өзің жатасың!» деген бұйрық алғандар «Аш болса, тоқаш жемей ме?» дейтін ақымақтарға мемлекет басқартпау керегін баяғыда түсінген батыс әлемінің тарихын, тиісінше монархия, патшалық дегендер жай ғана символ болып қалғанын әрине, білді. Бірақ бірінші кезекте сол системадан өздерінің кеткісі келмеді. Жә,Талдыкөлге оралайық. Экологтар әлі шырылдап отыр. Көлдің табанына салған үйлердің тұрғындары да шырылдауы мүмкін. Себебі SOS TALDYKOL қоғамдық бірлестігінің сарапшысы Руслан Оразалиев «Апта» бағдарламасының тілшісі Аманкелді Сейітханға көлдің қолдан бітелген бөлігі арқылы жүргізілген жылу құбырларының кей бөлігін қазір жер асты суы басып қалғанын көрсетті.