Құрбан айт кезінде елімізде қайырымдылық жасау, мұқтаждарға қол­ұшын беру ісі жыл сайын өрістеп келеді. Мұсылман мерекесі ұлттық жадымызда жаңғырып, кешірім мен қайырымдылық мерекесіне айналып отыр.

Әдетте, құрбан айтта жағдайы жететін мұсыл­мандар құрбандық шалады. Көбінесе қой, кейде сиыр немесе түйе шалынады. Құрбан малдың еті үшке бөлініп, құрбан шалушы еттің бір бөлігін мұқтаж жандарға, тағы бір бөлігін туған-туысы мен көршілерге береді. Қалған бөлігін өз отбасына қалдырады.

Дәстүрлі мұсылман ме­рекесінде еліміз құрбан шалудан бөлек қайы­рым­дылық акцияларын ұйым­­дастырып, мұқтаж отбасыларға, жал­ғыз­басты қарттарға, көпбалалы аналарға азық-түлік таратып жүр. Сондықтан да бұл күнді тек діни мереке деп қана емес, бірлік пен мейірім мерекесі деп те атайды. Мәселен, биыл мереке қарсаңында автобус апатынан қос аяғынан айырылған Алуа есімді қыздың отбасына Астана қаласының әкімдігі жеке демеушімен бірлесіп елордадағы жаңа тұрғын үй кешенінен 4 бөлмелі пәтердің сертификатын табыс­тады. Сонымен қатар құрбан малдың ақшасын зардап шеккен қыздың анасына жөнелтіп отырған жанашыр жандар да бар. Соның бірі белгілі пуб­лицист Қайнар Олжай ағамыз.

– Бұған дейін діни рәсім бойынша құрбандық шалып, үшке бөліп, мұқтаж жандарға тарататынмын. Ал биыл қоғамдағы ахуалға байланысты құрбан шалатын қаржымды зардап шеккен қыздың анасына ­аудардым, – деді ол.

Мейірім мерекесі қар­са­ңында өткен жылдары «Мың алғыс» рес­публикалық акция­сы аясында ел азаматтары бір­лесіп, мұқтаж 50 отбасына көмек қолын созған болатын. Ал баспанаға зәру көп­балалалы отбасына бе­ріліп отырған пәтерлер саны да жыл сайын артып келеді. Осылайша, әу бас­тан ар-иманын, обал-сауабын түгендеген қазақ қоғамы елдік, ұлттық бағдарын жаңғыртып отыр.