Украинаның Черкасс өңірінен 45 оқушы Қазақстанға келді, деп хабарлайды 24KZ. Олар 10 күн бойы «Балдәурен» республикалық оқу орталығында сауықтыру бағдарламасынан өтеді. Сапар Қазақстан және Украина елшіліктерінің қолдауымен жүзеге асырылып отыр. Бағдарламада тынығу және сауықтыруымен бірге түрлі танымдық шаралар қарастырылған. Тараптар: «Игі бастама екі ел арасындағы достықты нығайта түседі», – дейді.

Мектеп жасындағы дарынды балаларды Қазақстанға демалысқа жіберу бір жыл бұрын жоспарланған шара еді. Бірақ сәті тек осы жылдың маусымында түсті. Қазақстан мен Украина елшілігінің ұйымдастырумен 45 баланы және 4 ұстаз бен бір медбикені «Балдәурен» республикалық оқу сауықтыру орталығы құшақ жая қарсы алды.

Сергей Нагорняк, Украина Жоғарғы Рада депутаты, Қазақстан-Украина арасындағы парламентаралық достық тобының басшысы:

- Мен үнемі балалардың жетекшілерімен жіті байланыстамын. Қазақстанға жеткен балақайлар өте қуанышты. Осы ретте жолсапарды өте жақсы ұйымдастырған Қазақстанның Сыртқы істер министрлігіне зор алғысымызды айтамыз. Олар біздің балаларды Украинаның Черкасс өңірінен Польша шекара бекетіне дейін апарды. Әрі қарай балаларды Қазақстан Республикасының Польшадағы елшілігі күтіп алып, Варшавадағы әуежайға дейін шығарып салды.

Украиналық балалар Қазақстандағы демалысын өз құрбыларымен бірге өткізеді. Жеткіншектер бейбіт елде 10 күн бойы сауығу бағдарламасынан өтіп, тұмса табиғат аясында тыныстап қайтады. «Бұл екі елдің арасындағы достықты нығайтуға сеп болады», – дейді ұйымдастырушылар.

Сергей Нагорняк, Украина Жоғарғы Рада депутаты, Қазақстан-Украина арасындағы парламентаралық достық тобының басшысы:

- Украиналық балаларды Қазақстанға тынығуға алғаш рет жіберіп отырмыз. Бұл игі шара келесі жылы да жалғасын табады деген үміттеміз. Мұндай гуманитарлық бастама Әзербайжан, Өзбекстан елдерімен де орнатылған. Енді, міне, біздің балаларды Қазақстан қабылдап жатыр. Украиналық жеткіншектер үшін бейбіт елдерде бір мезгіл демалып қайту – өте үлкен қолдау.

Украиналық балалар Қазақстан туралы танымын кеңейту үшін еліміздің ең көркем аймағының бірі «Бурабай» ұлттық паркіне экскурсия жасайды. Астана қаласын аралап, саяхаттау жағы да қарастырылған.

Авторлары: Аида Қыдырбай, Дмитрий Рогач