Атырау облысының Индер ауданындағы Өтешқали Атамбаев атындағы ауылға орталықтандырылған ауызсу құбыры тартылды, деп хабарлайды 24KZ. Кейінгі 30 жылдан астам уақыт бойы ауыл тұрғындары тіршілік нәрін тасып ішкен еді. Енді, міне, ауызсу мәселесі де шешімін тапты . Ал осыдан үш жыл бұрын ауылға табиғи газ тартылып, бір жылдан соң электр желілері жаңғыртылды. Жалпы жыл соңына дейін өңірдің 65 елді мекенін орталықтандырылған ауызсу жүйесіне қосу жоспарланған.

Өтешқали Атамбаев ауылына тартылған су құбырын тұрғындар зор қуанышпен қарсы алды. Бір кезде ферма орталығы болған, 70-ке тарта отбасы өмір сүрген ауыл соңғы жылдары тірлік нәрінің тапшылығынан қаңырап қалған еді. Енді Мемлекет басшысының тапсырмасымен басталған бағдарлама ауылдарға жаңа өмір сыйлады.

Жанболат Жакупов, Ө. Атамбаев ауылының тұрғыны:

- Жайықтың іргесінде тұрсақ та, осы ауызсуды көлікпен таситын едік. Осы 2-3 ай төңірегінде құрылыс жұмыстары жүріп, бүгін таза су ауылымызға келіп жатыр. Біздер өте қуаныштымыз. Ендігі мұқтажымыз: біздің ауыл Атырау – Орал трассасынан 3 км жерде ішке қарай тұр. 3 шақырым кірме жолымыз бар. Осыны дұрыстап берсе деген тілегіміз бар.

Жыл басынан бері Махамбет ауданына қарасты Көздіқара, Есмақан, Бала Ораз, елді мекендеріне су құбыры тартылған болатын. Бүгін Атамбаев ауылына Ақтоғайдан ұзындығы 27 шақырымдық су құбыры іске қосылды. «Жалпы аудан бойынша 65 шақырым ауызсу құбыры тартылды», – дейді жергілікті билік өкілдері.

Жігер Төлеуғалиев, аудандық құрылыс бөлімінің басшысы:

- Президентіміздің тапсырмасына сәйкес ауызсуы жоқ 4 елді мекенге су жүргізілді. Көлемі 15 кубтық. Осы ауылға мұнарамыздың күшімен үйлерге тарайды. 2 сорғымыз Ақтоғайда тұр. Ауыл ішіндегі су желісі бар, соның бәрін қамтиды.

Ақтоғай ауылдық округіне қарасты ауылдарда 1200-ден астам тұрғын бар. Бүгін ауызсу жеткен Атамбаев ауылында 14 отбасы тұрады. Тұрғын саны шағын болғанымен, келешекте Жайық өзені жағасындағы ауылдарға адам толары анық. Қазірдің өзінде осы ауылдан жер телімін алуға 18 өтініш түсіпті.

Есім Мұратов, Ақтоғай ауылдық округінің әкімі:

- Былтыр мына көше жарығын қостық. 10 шақты шам. Одан кейін суымыз келді. Газ келді, су келді, тоғы бар. Мал шаруашылығына ыңғайлы жер. Сондықтан келем деген ауыл тұрғындарына есік ашық. Жеке шаруашылықты дамыту үшін деп 15 сотыққа дейін жер беріліп жатыр.

Биыл Атырау облысы бойынша осындай 65 елді мекенге таза ауызсу құбыры тартылады. Жайық, Ойыл және Қиғаш өзендерін бойлай қонған ауылдар тіршілік қамымен 1990 жылдардың аяғында жаппай қалаға қоныс аударған еді. Енді мемлекет қолдауымен жүзеге аса бастаған ауылдағы өркениетті көзімен көргендер ауылға қайта орала бастады.

Авторлары: Арыстанбек Кенже, Айбек Байзақов, Жандос Рахметуллин