«Қазцинк» кәсіпорны тау-кен металлургия саласындағы ең беделді «Алтын Гефест» сыйлығына ие болды, деп хабарлайды 24kz.

Мыс, мырыш және бағалы металдар өндірісіне негізделген ірі кен металлургия ұйымы бұл жолы «Өнеркәсіптік қауіпсіздік бойынша жыл көшбасшысы» аталымында жеңімпаз атанды. Салтанатты рәсім XV Халықаралық тау-кен металлургиялық конгресінің аясында өткізілді.

«Казцинк» – мыс, мырыш, қорғасын және алтын сынды бағалы металдар өндіретін еліміздегі жетекші кәсіпорындарының бірі. Бүгінде мұнда 30 мыңға жуық маман еңбек етеді. Өндіріс орындары Қазақстанның алты елді-мекенінде шоғырланған. Олардың әрқайсысы өңірлердің әлеуетін арттыруға және ел экономикасының жандануына елеулі үлес қосып келеді.

Евгений Фоминых, «Казцинк» компаниясының қоғаммен байланыс бөлімі басқармасының басшысы:

- Жыл сайын «Алтын Гефест» сыйлығының жүлдегері атанып жатқанымызға қуаныштымыз. Биыл біз өндірістік қауіпсіздік бойынша үздіктер қатарынан көрініп отырмыз. Әрине, ірі өндіріс орны үшін қызметкерлерінің денсаулығы басты назарда. Сондықтан жұмысшылардың қауіпсіздігін қамтамасыз ету үшін өнеркәсіптік қауіпсіздік саласын цифрландыру, арнайы мобильді қосымшалар мен цифрлық құралдарды қолдану сынды жүйелі жұмыстар жүргізіліп жатыр. Бұған соңғы бірнеше жылда өндіріс нысандарымызда өлім жағдайының тіркелмеуі дәлел.

«Алтын Гефест» сыйлығы биыл 15-ші жыл қатарынан өткізіліп отыр. Осы уақыт аралығында байқауға 2 мыңға жуық кәсіпорын мен ұйым өкілдері қатысқан.

Гаухар Бекманова, Халықаралық тау-кен металлургиялық конгресінің ұйымдастырушы директоры:

- Біз тау-кен саласының ең үздік геолог, металлург, шахтерлерін марапаттаймыз. Бұл жылы бізде 15 аталым бойынша 200-ден аса өтініш келіп түсті.

Байқау бірнеше жыл қатарынан Өнеркәсіп және құрылыс министрлігінің қолдауымен өткізіліп келеді. Бүгінде ол «Казцинк» сынды түсті металлургия өндірісінде өзіндік орны бар беделді кәсіпорындардың басын қосқан кәсіби жетістіктерді марапаттау алаңына айналды.

Авторлары: Назым Қайрат, Ғалымжан Адылахат