Қызылордада әлеуметтік нысандар ел игілігіне берілді. Сырдарияның сол жағалауында бір мезетте жаңадан мұражай, физика-математика мектебі мен музыкалық колледж ашылды . Аймаққа Үкімет басшысының орынбасары Ермек Көшербаев арнайы барып, көптің қуанышына ортақтасты.

Облыстық тарихи-өлкетану музейі заманауи ғимаратқа көшіп, тынысы кеңейді. Жаңа мұражайда экспозициялық 11 зал әзірленген және 250 мың көне жәдігер сақтауға мүмкіндігі бар. Яғни, енді қала тұрғындары мен қонақтар бұрын-соңды көрермен назарына ұсынылмаған тарихи мұраларды тамашалай алады.

Нұрлыбек Нәлібаев, облыс әкімі:

Президентіміздің қазақ деген байырғы атауы қайтарылған, тарихи әділдік орнаған Қызылордадағы маңызды оқиғалар ел жадында сақталуы тиіс екенін атап өтті. Бұл біз үшін зор мәртебе. Өңірімізде атқарылып жатқан жұмыстарға оң бағасы деп білеміз.

Сондай-ақ Қызылорда білімнің ордасы атанбақ. Сырдарияның бойында физика-математика бағытында оқытатын инновациялық лицей-интернат ашылды. Соңғы үлгідегі технологиялармен жабдықталған білім ошағына еліміз бойынша ең дарынды балалар іріктеліп, білім көкжиегін кеңейтеді.

Нұрасыл Бақыт, оқушы:

Мен бұл мектепке түскеніме өте қуаныштымын. Іріктеу кезеңі өте қиын болды. Бірақ қуанышыма орай өттім. Ең ұнағаны — физика. Өйткені ішінде мен көрмеген көп дүние бар. Сол үшін бұл мектепте үлкен мүмкіндік бар.

Сыр өнерпаздарының ұстаханасы Қазанғап атындағы музыкалық жоғары колледжі үшін де айтулы оқиға. Елу жылдық тарихы бар өнер ордасының енді еңселі өз ғимараты бар. Оқу корпусы жанынан 200 орындық жатақханасы да бар. Бұл жоба демеуші есебінен жүзеге асырылды.

Ал қызылордалық балаларға жазғы маусымда қайта жаңғыртудан өткен қалалық демалыс паркі ашылды. Ел Президентінің «Таза Қазақстан» экоакциясы аясында саябақ жаңа кейіпке еніп, жаңа аттракциондармен толықты.

Әділбек Серікұлы