Бұл туралы Caravan.kz медиа порталы kaz.inform.kz-ке сілтеме жасап хабарлайды.

Қаңтар–наурыз айлары аралығында Қазақстанға тұрақты тұруға Қытайдың 1 260 азаматы келген. Бұл өткен жылдың сәйкес кезеңімен салыстырғанда үш еседен астам жоғары көрсеткіш.

ҚР Стратегиялық жоспарлау және реформалар агенттігіне қарасты Ұлттық статистика бюросының мәліметінше, бірінші тоқсан қорытындысы бойынша Қытайдан көші-қон ағынының мұндай жоғары деңгейі кемінде соңғы тоғыз жылда алғаш рет тіркеліп отыр.

Сонымен қатар тоқсандық статистика дәстүрлі түрде құбылмалы болып келеді. Яғни күрт өсім кезеңдері кейін төмендеумен алмасып отырады.

Мәселен, бір жыл бұрын да көрсеткіш ерекше өсім көрсеткен. Сол кезде Қазақстанға келгендер саны 98 адамнан 750 адамға дейін, яғни шамамен сегіз есеге артқан.

Дегенмен соңғы екі жылдағы тұрақты жоғары көрсеткіштер Қытай азаматтарының көші-қон белсенділігінің өсу үрдісі қалыптасып келе жатқанын аңғартады.

Бірінші тоқсан қорытындысы бойынша Қытай Қазақстанға тұрақты тұруға көшіп келген азаматтар саны жөнінен үшінші орынға шықты. Бұл ретте екінші орында тұрған Ресейден айырмашылық небәрі бес адамды құрады. Ресейден Қазақстанға 1 265 иммигрант келген. Бұл өткен жылмен салыстырғанда 29 пайызға көп.

Көш бастап тұрған ел – Өзбекстан. Бұл елден 2 275 адам қоныс аударған. Алайда мұнда керісінше төмендеу байқалды – көрсеткіш былтырғы жылмен салыстырғанда 13 пайызға азайған.

Қытайдан келгендердің басым бөлігі – этникалық қазақтар. Олардың үлесі 99,5 пайызға жетеді. Қоныстану үшін ең танымал өңірлер қатарында Астана, Алматы қалалары, сондай-ақ Алматы облысы мен Жетісу облысы бар.

Иммиграциялық статистикаға тұрақты тұратын елін ресми түрде ауыстырған шетел азаматтары мен азаматтығы жоқ адамдар енгізіледі.

Бұған дейін Қазақстанда Қытайдан келген қандастар саны рекордтық деңгейге жеткені хабарланды.