Атырау облысындағы Жангелдин ауылында кісі қолынан қаза тапқан отбасына қатысты іс бойынша сотқа дейінгі тергеу аяқталды, деп хабарлайды KAZ.NUR.KZ облыстық прокуратураға сілтеме жасап.

"Сотқа дейінгі тергеу аяқталды", — деді ведомствоның баспасөз қызметі өкілдері.

Еске сала кетейік, 2025 жылдың желтоқсанында полицияға 66 жастағы ер адамның, 64 жастағы әйелдің, сондай-ақ олардың балалары – 32 жастағы ұлы мен 35 жастағы қызының хабар-ошарсыз кеткені туралы хабарлама түскен.

Туыстарының айтуынша, отбасы қарашадан бері байланысқа шықпаған. Төртеуіне де жоғалып кеткен адамдар ретінде іздеу жарияланды. Осы дерек бойынша сотқа дейінгі тергеп-тексеру басталып, жедел-тергеу тобы құрылды.

6 қаңтарда тергеу әрекеттері барысында үйдің ауласында орналасқан шаруашылық құрылыстың ішінен ерлі-зайыпты зейнеткерлердің денесі табылды. Осыдан кейін іс адам өлтіру дерегі бойынша қайта сараланып, балаларын іздестіру жалғасты.

Қылмыс жасады деген күдікпен 29 жастағы ер адамға, яғни осы отбасының бұрынғы күйеу баласына халықаралық іздеу жарияланды. Онымен бірге ерлі-зайыптының кіші қызы да халықаралық іздеуге берілді. Бұрын ол күдіктімен некеде тұрған.

Күдікті Индонезияда ұсталды. Онымен отбасының кіші қызы бірге жүргені анықталды.

Ұсталғаннан кейін ер адам кінәсін мойындады. Оның көрсетуімен жедел-тергеу тобы қосымша тергеу әрекеттерін жүргізді. Атыраудағы үй ауласын тексеру барысында бұған дейін хабар-ошарсыз кеткен ұл мен қыздың мәйіттері табылды.

"Қылмысқа ұзақ уақытқа созылған тұрмыстық жанжалдар себеп болған", — деді ІІМ Криминалдық полиция департаментінің бастығы Қанат Нұрмағамбетов.

Мәтіннен қате тапсаңыз, бізге жазыңыз