Дзюдошы Жалғас Қайролла Астанада өтіп жатқан әлемдік рейтингтік Qazaqstan Barysy Grand Slam турнирінің жеңімпазы атанды, деп хабарлайды Қазақстан дзюдо федерациясына сілтеме жасаған KAZ.NUR.KZ.

Федерацияның Telegram-дағы арнасында жарияланған мәліметке сүйенсек, 81 келіге дейінгі салмақта өнер көрсеткен Жалғас Қайролла финалдық белдесуде Молдова өкілі Петру Пеливанды жеңіп, алтын медальға ие болған.

"22 жастағы Жалғастың қарсыласы – Grand Slam турнирлерінің төрт дүркін жүлдегері және Masters турнирінің қола жүлдегері.

Бұл – Жалғас Қайролланың мансабындағы Grand Slam санатындағы алғашқы жүлдесі", — делінген хабарламада.

Осылайша, Қазақстан құрамасы дзюдодан Qazaqstan Barysy Grand Slam турнирінің алғашқы екі күнінде 1 алтын, 1 күміс және 2 қола медальға қол жеткізген.

Мәтіннен қате тапсаңыз, бізге жазыңыз