Қазақстанда 10 044 673 ер адам тұрады, деп хабарлайды KAZ.NUR.KZ Ұлттық статистика бюросының баспасөз қызметіне сілтеме жасап.

Мерекеге орай Ұлттық статистика бюросы ерлердің жас құрылымы мен өңірлер бойынша таралуы туралы ақпаратты жариялады. Ведомство мәліметінше, еңбекке қабілетті жастағы (16-60 жас) ерлердің үлесі 56,5 пайыз. Балалар (0-15 жас) – 30,2 пайыз, ал 61 жастан жоғары азаматтар – 13,3 пайыз.

Өңірлер бойынша ерлер ең көп шоғырланған аймақтар қатарында Алматы қаласы мен Түркістан облысы көш бастап тұр: әрқайсында шамамен 1,1 млн ер адам бар. Одан кейін Алматы облысы (806,5 мың) және Астана қаласы (785,4 мың) орналасқан.

Ер азаматтардың орташа жасы – 31,1 жас, ал күтілетін өмір сүру ұзақтығы – 72,19 жыл.

Еңбек нарығындағы үлесі

2025 жылғы деректерге сәйкес, жұмыспен қамтылған халық арасындағы ерлердің үлесі 51,6 пайыз немесе 4,8 млн адам.

Жалдамалы жұмысшылар арасында – 50,6 пайыз, өз бетінше жұмыспен қамтылғандар арасында – 55,1 пайыз, жеке кәсіпкерлер арасында – 54,7 пайыз.

Салалар бойынша ерлер көбіне өнеркәсіпте (16,5 пайыз), көтерме және бөлшек саудада (14 пайыз), ауыл шаруашылығында (12,4 пайыз), сондай-ақ көлік және қойма саласында (11,1 пайыз) жұмыс істейді.

Ең белсенді еңбек жас тобы – 35-44 жас аралығындағы ерлер, бұл санатта 1,4 млн адам бар.

Айта кетейік, 2026 жылдың алғашқы бес айындағы Қазақстандағы ең танымал ерлер есімі – Алан (817 адам).

Одан кейін Айсұлтан, Әлихан, Мұхаммед және Рамазан есімдері жиі кездеседі.

Мәтіннен қате тапсаңыз, бізге жазыңыз